अर्थमन्त्री डा. स्वर्णिम वाग्लेले विनियोजन विधेयकका सम्बन्धमा बारम्बार प्रतिरक्षा गरिरहेका छन् । १५ जेठमा बजेटसँगै आर्थिक विधेयक सार्वजनिक गरेलगत्तै अर्थमन्त्रीले पटक–पटक करका दरहरू चलाएको र सूचना चुहाएको आरोप लाग्दैगर्दा सोको खण्डनमा अर्थमन्त्री वाग्लेले बारम्बार आफूलाई निर्दोष रहेको दाबी गरिरहेका छन् ।
यसै सम्बन्धमा अर्थमन्त्री वाग्लेले बुधबार अर्थ समितिको बैठकमा उपस्थित हुँदै आफूले विनियोजित विधेयक नचलाएको दाबी गरेकामा लगत्तै बिहीबार सार्वजनिक लेखा समितिमा समेत पुनः सोही कुरा दोहोर्याएका छन् ।
बरु नेकपा एमाले र नेपाली कांग्रेस नेतृत्वको अघिल्लो सरकारले विधेयक सार्वजनिक भइसकेपछि ७३ वटा करका दरहरू नै परिवर्तन गरिएको दाबी गरे । उनले भने, ‘अघिल्लो सरकारले करका दरहरू नै परिवर्तन गरेका छन् । तर, हामीले कुनै पनि दरहरूमा तलमाथि गरेका छैनौँ । केही भाषागत त्रुटिहरू सच्याउनुबाहेक अरु केही गरिएको छैन,’ वाग्लेले भने । यही कुरा उनले अघिल्लो दिन अर्थ समितिमा पनि भनेका थिए ।
