काठमाडौं । अध्ययन बिदा वा अन्य स्वीकृत बिदाको अवधि समाप्त भएपछि पनि कार्यालयमा हाजिर नभई लामो समयसम्म अनुपस्थित रहने सरकारी कर्मचारीविरुद्ध सरकारले कारबाही प्रक्रिया तीव्र बनाएको छ।
मंगलबार विभिन्न सरकारी निकायहरूले यस्ता कर्मचारीलाई स्पष्टीकरण सोध्ने प्रक्रिया अघि बढाएका छन्। सार्वजनिक गरिएका सूचनाअनुसार पूर्वाधार विकास मन्त्रालयले लामो समयदेखि अनुपस्थित रहेका ८ जना कर्मचारीसँग लिखित स्पष्टीकरण मागेको छ।
त्यसैगरी, उद्योग मन्त्रालयले एक जना कर्मचारीलाई तथा महालेखा परीक्षकको कार्यालयले पनि एक जना कर्मचारीलाई निर्धारित समयभित्र स्पष्टीकरण पेश गर्न निर्देशन दिएको छ।
सम्बन्धित निकायहरूले कर्मचारीहरूलाई तोकिएको अवधिभित्र उपस्थित भई आफ्नो अनुपस्थितिको कारण स्पष्ट पार्न आग्रह गरेका छन्। अन्यथा प्रचलित कानुन तथा निजामती सेवा सम्बन्धी व्यवस्था अनुसार आवश्यक विभागीय कारबाही अघि बढाइने चेतावनी समेत दिएका छन्।
सरकारले स्वीकृत बिदा समाप्त भएपछि पनि बिना जानकारी वा स्वीकृति लामो समयसम्म अनुपस्थित रहने कर्मचारीमाथि कानुनबमोजिम कारबाही गर्ने नीति अनुरूप पछिल्ला दिनमा यस्ता प्रक्रिया तीव्र बनाएको जनाएको छ।
