भारतमा कक्रोच जनता पार्टीको पहिलो प्रदर्शन
भारतमा सामाजिक सञ्जालबाट चर्चामा आएको कक्रोच जनता पार्टी (सीजेपी)ले दिल्लीमा प्रदर्शन गरेको छ । ठट्टाको रूपमा स्थापित भएको भारतको सबैभन्दा ठूलो अनलाइन युवा अभियान पहिलो पटक सडकमा निस्किएको हो ।
संघीय राजधानी दिल्लीको जन्तर–मन्तरमा आन्दोलन शुरू भएसँगै स्थानीय प्रशासनले त्यहाँको सुरक्षा व्यवस्था कडा पारेको छ । अमेरिकाबाट आजै बिहान दिल्ली आएका सीजेपीका संस्थापक अभिजीत दीपके पनि जन्तर मन्तरमा पुगेर प्रदर्शनमा सहभागी बन्नुभएको छ । उहाँले प्रदर्शनलाई शान्तिपूर्ण बनाउन आह्वान गर्नुभएको छ ।
विमानस्थलबाट बाहिर निस्केपछि सञ्चारमाध्यमसँग कुरा गर्दै दिपकेले शिक्षामन्त्री धर्मेन्द्र प्रधानको राजीनामा माग्नुभयो । नेशनल इलिजिबिलिटी इन्ट्रान्स टेस्ट’ अर्थात् ‘नीट’ परीक्षाको प्रश्नपत्र बाहिरिएपछि पाँच जना विद्यार्थीले आत्महत्या गरेकाले शिक्षामन्त्रीको राजिनामा मागेको उहाँको भनाइ छ ।
शिक्षाविद् तथा लद्दाखका पर्यावरण अभियानकर्ता सोनम वाङ्चुक पनि प्रदर्शनमा पुग्नुभएको छ । बीबीसी हिन्दीका अनुसार सीजेपीविरुद्ध सत्ताधारी भारतीय जनता पार्टीका समर्थकहरू पनि जन्तर मन्तरमा पुगेका थिए । प्रहरीले उनीहरूलाई भने विरोध गर्न रोकेर बाहिर निकालिदिएका छन् ।
युवाहरुले कक्रोच नाम भारतका प्रधानन्यायाधीशबाट लिएका हुन्, जसले बेरोजगार युवालाई कक्रोचसँग तुलना गर्नुभएको थियो । गएको महिना शुरू भएदेखि यस अभियानले इन्स्टाग्राममा झन्डै २ करोड २० लाख फलोअरर्सहरू पाएको छ । यो सरकारप्रतिको असहमतिको सबैभन्दा ठूलो मध्येको अभिव्यक्ति बन्न पुगेको छ ।
यो अभियानलाई भारतका चर्चित र वरिष्ठ कानूनविद् प्रशान्त भूषणले नवयुवा आन्दोलनको संज्ञा दिनुभएको छ । यसैबीच दिल्ली प्रहरीले कक्रोच जनता पार्टीको प्रदर्शनका क्रममा दुई समूहबीच हुनसक्ने सम्भावित झडपलाई रोक्न ६ जनालाई पक्राउ गरेको र अहिलेसम्म अरू कुनै अप्रिय घटना नभएको बताएको छ ।
