मलेसिया जान तीन लाख माग्ने म्यानपावरमाथि स्टिङ अपरेशन, एजेन्ट पक्राउ
काठमाण्डौ – वैदेशिक रोजगारीका लागि मलेसिया जान लागेका सप्तरीका अजयकुमार यादवसँग तीन लाख रुपैयाँ माग्ने काठमाण्डौ कोटेश्वरको एक म्यानपावर कम्पनीमाथि प्रहरीले स्टिङ अपरेसन गरेर एजेन्टलाई पक्राउ गरेको छ ।
कोटेश्वरको ‘ग्रान्ड स्विट जब’ कम्पनीका कर्मचारीले तीन लाख रुपैयाँ नदिए उड्न दिन्न भनेपछि यादव गएको वैशाख २९ गते मलेसिया उड्न पाउनु भएन । यसअघि उहाँले कम्पनीकै झापामा रहेको शाखा कार्यालयबाट सबै प्रक्रिया पूरा गर्नुभएको थियो । सरकारको ‘फ्री भिसा फ्री टिकट’को नीति अनुरूप आफूले म्यानपावर कम्पनीलाई आवश्यक प्रक्रियाबापत बढीमा १० हजार मात्रै तिर्नुपर्नेमा नगद ७० हजार रुपैयाँ यसअघि नै तिरिसकेको यादवले बताउनुभयो ।
तर थप रकम मागेपछि हिजो बिहान एजेन्ट अर्थात् कम्पनीका कर्मचारीलाई तीनकुने गैरीगाउँ अगाडि पैसा लिन बोलाएको र यसबारे पहिल्यै श्रम मन्त्री रामजी यादवको सचिवालयलाई जानकारी गराएपछि तीनकुनेमा रहेको प्रहरी वृत्तको टोली खटिएको थियो । प्रहरीले थप पैसा लिने म्यानपावरका कर्मचारीलाई पक्राउ गरेको छ ।
प्रहरीका अनुसार १० हजारमा हुने काममा ३ लाख मागेको कर्मचारीले स्वीकारेपछि उनलाई पक्राउ गरिएको हो । यादवको राहदानी, श्रम स्वीकृति, बीमा र हवाई टिकट बरामद गरी हस्तान्तरण गरेसँगै आज उहाँ मलेसिया उड्नु हुने भएको छ ।
श्रम तथा रोजगार मन्त्रालयले वैदेशिक रोजगारीमा जाँदा कुनै पनि समस्या परेमा सिधै श्रम मन्त्रालयमा सम्पर्क गर्न आग्रह समेत गरेको छ । पक्राउ परेका ती कर्मचारीमाथि थप कानुनी कारबाहीका लागि प्रहरीले अनुसन्धान अगाडि बढाएको छ ।
