संसदबाट चुनिएका प्रधानमन्त्री वालेन्द्र शाह (बालेन) बुधबार जस्तै बिहीबार पनि सरकारकै नीति तथा कार्यक्रमको छलफल र जवाफमा सहभागी हुन अस्वीकार गरेका छन् ।
विपक्षीले विरोध गर्दै मुद्दा नै बनाएको विषयलाई प्रधानमन्त्री बालेनले बेवास्ता गरेका हुन् । बुधबार सरकारको नीति तथा कार्यक्रममाथि छलफल गरियोस् भन्ने प्रस्ताव प्रधानमन्त्री बालेन नै प्रस्तुत गर्ने कार्यसूची थियो । त्यसैले कार्यसूचीमा नाम राखेर बालेन नआएको भन्दै विपक्षीले तीनपटकसम्म संसद अवरोध गरेका थिए ।
दोस्रो प्रयासमा प्रधानमन्त्रीका तर्फबाट अर्थमन्त्री डा. स्वर्णिम वाग्लेले नीति कार्यक्रममाथि छलफल गरियोस् भन्ने प्रस्ताव प्रस्तुत गरेका थिए । तर, प्रधानमन्त्री बिहीबार आउनुपर्ने विषयमा सभमुखले रुलिङ गर्नुपर्ने माग विपक्षीले राखे । जसको कारण बुधबार नीति कार्यक्रममाथि छलफल हुन सकेन ।
बिहीबार भने प्रधानमन्त्री बालेन्द्रको तर्फबाट अर्थमन्त्री वाग्लेले नीति कार्यक्रममाथि उठेका प्रश्नको जवाफ दिने प्रतिनिधिसभाको कार्यसूची सार्वजनिक गरिएको हो ।
विपक्षीहरूले आफैँले प्रस्तुत गरेको नीति कार्यक्रमको स्वामित्व लिनसमेत प्रधानमन्त्री बैठकमा आउनुपर्ने, छलफलमा सहभागी हुने र जवाफ दिनुपर्ने मत राख्दै आएका छन् । तर, निर्वाचित भएदेखि नै संसदलाई बेवास्ता गरेका प्रधानमन्त्री सरकारकै वार्षिक नीति कार्यक्रमको प्रस्ताव, छलफल र जवाफमा सहभागी नहुने भएका हुन् ।
विपक्षीको विरोधपछि बिहीबार भने दुवै सदनमा वैशाख २८ गते प्रस्तुत सरकारको नीति तथा कार्यक्रममाथि प्रधानमन्त्रीको तर्फबाट अर्थमन्त्रीले जवाफ दिने कार्यसूची निकालिएको हो । अघिल्लो दिन कार्यसूचीमा नाम राखेर प्रधानमन्त्री नआएकोमा विपक्षीले आपत्ति जनाएका थिए । त्यसैले बिहीबार प्रधानमन्त्रीको तर्फबाट अर्थमन्त्रीले जवाफ दिने विषय कार्यसूचीमै उल्लेख भएको छ ।
