रास्वपा सांसद राजीव खत्रीले प्रधानन्यायाधीश नियुक्ति सिफारिसका विषयमा आइरहेको धारणामाथि टिप्पणी गर्दै उमेरभन्दा कर्म ठूलो हुने बताएका छन्।
उनले सामाजिक सञ्जालमार्फत प्रतिक्रिया दिँदै मैदानमा छ जनालाई दौडाएपछि जसले पनि जित्न सक्ने तर्क राखे। साथै खत्रीले चार नम्बरले जित्न हुँदैन भनेर रुनुको अर्थ नभएको उल्लेख गरे। ‘मैदानमा छ जनालाई दौडाएपछि जसले पनि जित्न सक्छ। चार नम्बरले जित्न हुँदैन भनेर रूनुको अर्थ छैन। मान्छे उमेरले होइन- कर्मले श्रेष्ठ हुन्छ,’ उनले भनेका छन्।
सांसद खत्रीले मान्छे मरेपछि कहाँ जान्छ, स्वर्ग र नर्क हुन्छ कि हुँदैन जस्ता सबै तर्क र बहसका विषय भएको भनाइ राखे। तर न्याय र विवेकको आँखा विशुद्ध भइदिए मानिसका लागि स्वर्ग र नर्क यही धर्तीमै हुने उनले बताए।
‘मान्छे मरेपछि कहाँ जान्छ? स्वर्ग र नर्क हुन्छ कि हुँदैन? यी सबै तर्क र बहसका विषय हुन्। तर न्याय र विवेकको आँखा विशुद्ध भइदिने हो भने मानिसका लागि स्वर्ग र नर्क यही धर्तीमा छ,’ उनले भने।
