सरकारले भन्यो– ‘प्रधानन्यायाधीशमा शर्माको सिफारिश कार्यक्षमताका आधारमा’
काठमाण्डाै – नेपाल सरकारका प्रवक्ता एवम् शिक्षा, विज्ञान तथा प्रविधि मन्त्री सस्मित पोखरेलले संवैधानिक परिषद्ले कार्यक्षमतालाई मुख्य आधार बनाएर प्रधानन्यायाधीशमा डा. मनोजकुमार शर्मालाई सिफारिश गरेको बताउनुभएको छ ।
वरीयताक्रम मिचेर चौथो वरीयताका न्यायाधीश शर्मालाई संवैधानिक परिषद्ले प्रधानन्यायाधीशमा सिफारिश गरेको भन्दै आलोचना भइरहेका बेला सरकारका प्रवक्ता पोखरेलले राजनीतिको प्रभावमा नपरेका र कार्यक्षमतामा अब्बल भएकाले शर्मालाई प्रधानन्यायाधीशमा सिफारिश गर्ने निर्णय संवैधानिक परिषदमा भएको दाबी गर्नुभएको हो ।
आजको मन्त्रिपरिषद् बैठकपछि निर्णय सुनाउनेक्रममा पत्रकारको प्रश्नमा जवाफ दिँदै उहाँले न्यायालयलाई सुधार गर्दै लैजाने क्रम पहिलो पटक शुरू भएको बताउँदै यसलाई अझै व्यवस्थित ढङ्गले अघि बढाउने उल्लेख गर्नुभयाे ।
प्रवक्ता पोखरेलले कार्यक्षमताको हिसाबले प्रधानन्यायाधीश सिफारिश गरिएको नेपालको इतिहासमा याे पहिलाे भएकाे दाबी गर्नुभयो । त्यसैगरी उहाँले लिपुलेकलगायतका नेपाली भूमि फिर्ता ल्याउनका लागि भारत सरकारसँग सरकारले संवाद नै गरेर अघि बढ्ने पनि बताउनुभयो ।
