गएराति पूर्वी क्षेत्रमा मध्यमसम्मको पानी पर्यो
काठमाण्डौ – पानी पार्ने प्रणाली पूर्वतिर सर्दै गएकाले पूर्वी क्षेत्रमा तुलनात्मक रूपमा धेरै वर्षा भएको छ । पछिल्लो १२ घण्टामा सबैभन्दा धेरै कोशी प्रदेशको चैनपुर, तुम्लिङटार र तमोर नदीको आसपासको क्षेत्रमा ५० मिलिमिटरको वर्षा मापन भएको मौसम पूर्वानुमान महाशाखाले जनाएको छ ।
हिजो दिनभर देशैभर वर्षा भए पनि बेलुकादेखि वर्षा गराउने प्रणाली पूर्वतिर सर्दै गएको थियो । गएराति देशभर सामान्य बदली भएको छ । नेपालमा हाल पश्चिमी वायु, स्थानीय वायु तथा पूर्वी भूभाग नजिक तल्लो वायुमण्डलमा रहेको न्यून चापीय क्षेत्रको संयुक्त प्रभाव रहेको छ ।
साथै, दक्षिणी भूभाग हुँदै पूर्वदेखि पश्चिमसम्म फैलिएको न्यून चापीय रेखाले पनि मौसममा प्रभाव पारिरहेको विभागले जनाएको छ । यो हप्ताभर वर्षा गराउने प्रणाली सक्रिय रहने भएकाले हुरीबतास, चट्याङ र ठूलो वर्षाबाट हुन सक्ने क्षति कम गराउन आवश्यक सतर्कता अपनाउन विभागले आग्रह गरेको छ ।
