कञ्चनपुरको पुनर्वास नगरपालिकामा ट्याक्टरले किच्दा दुई जनाको मृत्यु भएको छ भने एक बालक गम्भीर घाइते भएका छन्।
पुनर्वास नगरपालिका–७ मा न्यू इँटा उद्योगमा गएराति दुर्घटना भएको हो। काँचो इँटामा पानी हाल्ने क्रममा से १ त ८८७६ नम्बरको ट्याक्टरले ठक्कर दिँदा उद्योगमा कार्यरत कामदारहरू चपेटामा परेका थिए।
दुर्घटनामा परी भारतको उत्तर प्रदेश बहराइच जिल्लाका २७ वर्षीय अजय कुमार र ९ वर्षीय पवन कुमारको मृत्यु भएको सुदूरपश्चिम प्रदेश ट्राफिक प्रहरी कार्यालय अत्तरियाले पुष्टि गरेको छ। ट्याक्टरको ठक्करबाट गम्भीर घाइते भएका उनीहरूलाई तत्काल उपचारका लागि धनगढी लगिएको थियो।
उपचारकै क्रममा अजयको सेती प्रादेशिक अस्पतालमा र पवनको नवजीवन अस्पतालमा मृत्यु भएको प्रहरी उपरीक्षक (एसपी) प्रेमबहादुर शाहीले जानकारी दिए।
सोही घटनामा ११ वर्षीया घुर्रा कुमार गम्भीर रूपमा घाइते भएका छन् । उनको अहिले सेती प्रादेशिक अस्पतालमा उपचार भइरहेको छ।
दुर्घटना लगत्तै ट्याक्टर चालक फरार भएकाले प्रहरीले उनको खोजी कार्य तीव्र पारेको छ। हालसम्म चालकको पहिचान खुल्न सकेको छैन भने घटनाको सम्बन्धमा थप विस्तृत अनुसन्धान अगाडि बढाइएको प्रहरीले जनाएको छ।
