भरतपुर । नेपाल तमू (गुरूङ) विद्यार्थी छोँज धीँ चितवनका अध्यक्ष रूक्सन गुरूङले सामाजिक काम गर्नका लागि फाउन्डेसन स्थापना गरेका छन् । २५७०औँ बुद्ध जयन्तीको अवसरमा उनले ‘लिटिल राइनो फाउन्डेसन’को स्थापना गरेका हुन् ।
फाउन्डेसनले सुरूको दिनमै महाबौद्ध गुम्बा परिसरभित्र रहेको पोखरीमा १०८ वटा माछा छाडेको छ । नेपाल तमू विद्यार्थी छोँज धीँसँगको सहकार्यमा खुला रक्तदानसमेत आयोजना गरिएको थियो ।
तमू विद्यार्थीका अध्यक्ष गुरूङले आफू सवारी दुर्घटनामा परेपछि फाउन्डेसन स्थापना गर्ने सोच बनाएको बताए । समाजमा देखिने सानातिना समस्या समाधानका लागि सकेको सहयोग गर्ने, कतिपय अवस्थामा पहलकदमी गरिदिनेजस्ता कार्यलाई फाउन्डेसनले समेट्ने उनले बताए । फाउन्डेसनमार्फत काम गर्दा विभिन्न संघसंस्था तथा व्यक्तिलाई पनि सहभागी गराउन सजिलो हुने उनले बताए ।
अध्यक्ष गुरूङ सानै उमेरबाट सामाजिक कार्यमा बढी सक्रिय छन् । उनले यसअघि पनि व्यक्तिगतरुपमै महाबौद्ध गुम्बा परिसरमा करिब एक लाख रूपैयाँभन्दा बढी रकम खर्चेर स्टिलको बार (रेलिङ) लगाइदिएका थिए । दाताको पर्खाइमा रहेको संस्थालाई उनले बेलामौकामा सहयोग गर्दै आएका छन् । विश्वकै दुर्लभ एकसिङ्गे गैँडाको बासस्थान भएको हुँदा फाउन्डेसनको नाममा गैँडा जोडिएको उनले बताए ।
