भणडारा , बैशाख १७ :-
राप्ती नगरपालिका–४, चितवनमा १५ दिने कफी मेकिङ तथा ब्युटिसियन तालिम आजबाट औपचारिक रूपमा सुरु भएको छ। वडा नं. ४ को कार्यालयको आयोजनामा काशिरूप आधारभूत विद्यालयमा उद्घाटन समारोहका साथ तालिमको थालनी गरिएको हो।
“समृद्ध राप्ती नगरको आधार: कृषि, पर्यटन र पूर्वाधार” भन्ने मूल नाराका साथ सञ्चालन गरिएको तालिममा स्थानीय युवायुवती तथा महिलाहरूको उत्साहजनक सहभागिता रहेको छ। तालिममार्फत सहभागीहरूलाई स्वरोजगारमुखी सीप विकास गराउने लक्ष्य लिइएको आयोजकले जनाएको छ।
उद्घाटन कार्यक्रममा बोल्दै वडा नं. ४ का वडाध्यक्ष केदार आचार्य र प्रमुख प्रशासकीय अधिकृत प्रदीप पौडेलले यस्ता तालिमले बेरोजगारी न्यूनीकरण गर्दै स्थानीय स्तरमै आयआर्जनका अवसर सिर्जना गर्ने विश्वास व्यक्त गरेका थिए।
तालिम अवधिभर सहभागीहरूलाई कफी मेकिङसम्बन्धी व्यावसायिक ज्ञान, ग्राहक सेवा, साथै ब्युटिसियनसम्बन्धी आधारभूत तथा उन्नत सीपहरू प्रदान गरिनेछ।
आयोजकका अनुसार तालिम पश्चात् सहभागीहरूलाई स्वरोजगारतर्फ प्रेरित गर्ने योजना समेत रहेको छ।
