काठमाडौं विश्वकै सर्वाधिक प्रदूषित प्रमुख शहरको सूचीमा पहिलो नम्बरमा परेको छ । विश्वका प्रमुख सय शहरमा काठमाडौंको वायु सबैभन्दा बढी प्रदूषित रहेको स्विजरल्यान्डस्थित वायु प्रदूषण मापन गर्ने अन्तर्राष्ट्रिय संस्था आइक्यु एयरले जनाएको छ ।
आईक्यूएयरका अनुसार काठमाडौंको एयर क्वालिटी इन्डेक्स २१० छ । जनस्वास्थ्यका निम्ति यो ‘अति अस्वस्थकर’ हो ।
एक्यूआई १०१ देखि १५० को वायु बालबालिका, वृद्धवृद्धा र दीर्घरोगीका निम्ति ‘अस्वस्थकर’ हुन्छ । त्यो १५१ देखि २०० सम्म पुगेमा सबैका निम्ति अस्वस्थकर हुन्छ । यस्तै, २०१ देखि ३०० सम्म पुगेमा ‘अति अस्वस्थकर’ र त्योभन्दा माथि भएमा ‘खतरनाक’ बन्दै जाने डब्ल्यूएचओको मापदण्ड छ ।
एयर क्वालिटी इन्डेक्स १६२ रहेको दिल्ली विश्वको सबैभन्दा प्रदूषण भएको दोस्रो शहरमा परेको छ ।
त्यस्तै, १५२ एक्यूआईसहित बंगलादेशको ढाका तेस्रो सर्वाधिक प्रदूषित सहर बनेको छ । प्रदूषणको उच्च मापन भएका अन्य सहरहरूमा थाइल्यान्डको चियाङ माई १५१ एक्यूआईसहित चौथो स्थानमा छ।
यसैगरी, पाकिस्तानको लाहौर १४४ एक्यूआईसहित पाँचौँ र भारतको कोलकाता १२७ एक्यूआईसहित छेठौँमा छ ।
