माडी । माडी नगरपालिकाका सबै वडाहरुमा वडास्तरीय सार्वजनिक सुनुवाइ सञ्चालन भएका छन् । कार्यक्रममा सहभागीहरुले सडक, खानेपानी, नाला व्यवस्थापन, बसोवास, स्वास्थ्यसेवालगायतका विषयमा आफ्ना धारणा राखेका थिए ।
बुधबार बरूवास्थित पाँचपाण्डव मध्यवर्ती उपभोक्ता समितिको कार्यालय भवनको खुला हलमा माडी–२ वडा कार्यालयको आर्थिक वर्ष २०८२/०८३ को वडास्तरीय सार्वजनिक सुनुवाइ सम्पन्न भएको थियो । सार्वजनिक सुनुवाइमा सहभागी रहँदै माडी नगरपालिका–२ का वडावासीले भैरवपुरस्थित विद्यालय भवन बेवारिसे अवस्थामा रहेको भन्दै यसको व्यवस्थापन गर्न माग गरे । साथै, विपन्न विद्यार्थीहरुले स्कुल बसको भाडा तिर्न नसकेको उल्लेख गर्दै यसतर्फ वडाले ध्यान दिनुपर्ने सुझाव दिए । यस्तै निकुञ्जछेउका गाउँहरुमा जङ्गली जनावरको समस्या बढ्दै गएको उल्लेख गर्दै समस्या न्यूनीकरणका लागि पहल गर्न माग गरे ।
त्यसैगरी, अपाङ्गता भएका व्यक्तिहरुका लागि निःशुल्क स्वास्थ्य बिमा र आयआर्जनमा सहयोग गर्नुपर्ने, आधारभूत आवश्यकतामा प्राथमिकता दिनुपर्ने र त्यसपछि मात्र भ्यू–टावर, सङ्ग्रहालय, पार्क वा रङ्गशाला निर्माण गर्नुपर्ने, खेल क्षेत्रमा लगानी बढाउन र थप स्थानमा खुला व्यायामशाला निर्माण गर्नुपर्ने आवश्यकता औँल्यायका थिए । वडाध्यक्ष डण्डपाणि पौडेलले सहभागीका प्रश्नको जवाफ दिएका थिए ।
यस्तै, माडी–१ वडा कार्यालयले गरेको सार्वजनिक सुनुवाइमा वडावासीहरुले लक्ष्मुनियाँको बाटो अधुरो रहँदा धुलाम्मे भएको, द्रौपतीनगर खानेपानीबाट दिनको एक घन्टा मात्र पानी आउने गरेको, शिविर टोलपछाडिको नाला अधुरो रहेको, कालोपत्रे सडकका लागि उठाइएको रकम नगरपालिकामा जम्मा गरेको पाँच वर्ष भइसक्दा पनि करिब १ किलोमिटर सडक कालोपत्रे हुन बाँकी रहेको गुनासो गरेका थिए ।
यस्तै, विपद् व्यवस्थापनका लागि डाङ्ग्रे खोला, चितई खोलालगायतमा करिडोर निर्माणको पहल गर्न, बरूवा बजारका हेमलाल ढकालले बजार क्षेत्रमा नाला व्यवस्थापन तथा चैनपुर जाने बाटोमा रहेको डाङ्ग्रे खोलामा पुल निर्माण गर्न सुझाव दिएका थिए । सहभागीहरुका प्रश्नको जवाफ वडाध्यक्ष अमितकुमार लामाले दिएका थिए ।
बुधबार माडी–२ र बिहीबार माडी–३ मा सार्वजनिक सुनुवाइ सञ्चालन भएका छन् भने आज शुक्रबार माडी–४ मा सञ्चालन हुनेछ । त्यसैगरी, वैशाख १४ गते सोमबार वडा नं–५ मा, १५ गते मङ्गलबार वडा नं–६ मा, १६ गते बुधबार वडा नं–७ मा, १७ गते बिहीबार वडा नं–९ को कृष्णनगरमा, १८ गते (बुद्धजयन्ती पर्वका दिन) हनुमानझुला (प्रस्तावित वडा नं–१०) मा र वैशाख २१ गते सोमबार माडी–८ मा सार्वजनिक सुनुवाइ हुनेछ ।
