केही समयअघि प्रगतिशील लोकतान्त्रिक पार्टीको अध्यक्ष परिषदबाट राजीनामा दिएका सुदन किरातीले बुधबार साधारण सदस्य समेत त्याग गरे। उनले राजीनामा दिनुको कारण खुलाएका छैनन्, न त आगामी यात्राबारे नै केही भनेका छन्।
तर, हर्क साम्पाङ नेतृत्वको श्रम संस्कृति पार्टीमा प्रवेश गर्ने तयारी साथ उनले राजीनामा दिएको सुदननिकट नेताहरूको भनाइ छ। हर्कले सुदनलाई पार्टीको वरिष्ठ नेता बनाउने वचन दिइसकेको नेताहरूले बताएका छन्।
पाँच महिनाअघि मात्र सुदन नेकपाबाट जनार्दन शर्मासँगसँगै बाहिरिएका थिए। उनीहरूले डा बाबुराम भट्टराई, रास्वपा छाडेका सन्तोष परियारलगायतसँग मिलेर प्रलोपा गठन गरेका थिए।
चुनावलाई लक्षित गरी खोलिएको सो पार्टी चुनाव नआइपुग्दै थला पर्यो। चुनावमा सो पार्टीले एक सिट पनि जितेन। जनार्दन पराजित भए। बाबुरामले दिएको उम्मेदवारी फिर्ता लिए। सुदनले उम्मेदवारी नै दिएनन्।
बरु सुदनले आफ्नो क्षेत्र भोजपुर र धरानमा श्रम संस्कृतिका उम्मेदवारलाई सघाए। भोजपुरमा त घरघरै पुगेर उनले श्रम संस्कृतिकै ध्रुवराज राईलाई मत मागेका थिए। नभन्दै राई चुनाव पनि जिते।
चुनाव प्रचारमा खटिएकै बेला कोसीमा हर्कको पक्षमा जनलहर देखेपछि सुदनले श्रम संस्कृतिमा राजनीतिक भविष्य देखेका थिए।
त्यसपछि उनको हिमचिम श्रम संस्कृति पार्टीका नेताहरूसँग बढ्दै गयो। अध्यक्ष हर्कराज साम्पाङले सुदनलाई पार्टीमा भित्र्याउन पटकपटक छलफल गरिसकेका छन्। हर्कले सुदनलाई श्रम संस्कृतिमा ल्याउन उपाध्यक्ष लगायतका पद प्रस्ताव गरेका थिए।
तर, सुदनले त्यसलाई अस्वीकार गरेपछि उनी वरिष्ठ नेता पद दिन तयार भएका हुन्।
हर्कको प्रस्तावबारे किराती पनि सकारात्मक रहेको उनीनिकटहरूको भनाइ छ।
सम्भवतः केही दिनमै यसबारे निर्णय हुने श्रम संस्कृति पार्टीका महासचिव आरेन राईले जानकारी दिए।
‘उहाँलाई पार्टीमा ल्याउने विषयमा छलफल भइरहेको छ, वरिष्ठ नेता बनाउने भनेर बाहिर आएको पनि छ,’ उनले भने, ‘कसरी अगाडि जाने भनेर पटकपटक उहाँसँग कुरा भइरहेको छ।’
यद्यपि, पदको विषय आपसी समझदारीमा टुंगो लगाउन सकिने उनको भनाइ छ।
नेताहरूका अनुसार सुदन एक्लै भन्दा पनि एउटा समूह नै लिएर श्रम संस्कृतिमा प्रवेश गर्ने सम्भावना छ।
‘उहाँसँग आफ्नै टिम पनि छ, त्यसमा विभिन्न पार्टी छोडेका युवाहरू छन्,’ श्रम संस्कृतिका अर्का एक नेताले भने, ‘त्यही टिमसहित उहाँसँग एकता होला।’
सुदनले भने आफूले निर्णय गरिनसकेको बताए। तथापि, अबको राजनीति श्रम संस्कृतिबाटै हुने संकेत गरे।
‘विभिन्न चरणमा छलफल भएको साँचो हो,’ उनले भने, ‘मैले कुनै निर्णय गरिसकेको छैन, भेटघाट र रायसल्लाह लिँदैछु।’
प्रतिनिधि सभाको सुनसरी २, भोजपुर र खोटाङमा प्रत्यक्षतर्फ जितेको श्रम संस्कृतिले समानुपातिकमा पनि ३ लाख मत कटाएको छ। ७ सांसद रहेको श्रमसंस्कृति पार्टीले कोसी प्रदेशमा राष्ट्रिय स्वतन्त्र पार्टीलाई टक्कर दिएको थियो।
धरान उपमहानगरपालिकाको मेयर हुँदा पानी बाँडेर धरानेको मन जितेका साम्पाङले चुनावको मुखमा आफ्नै अध्यक्षतामा श्रम संस्कृति पार्टी गठन गरेका हुन्। अहिले उनको पार्टीको केन्द्रीय समिति २८ सदस्यीय रहेको महासचिव आरेन राइले बताए।
सुदनलाई ल्याउन पार्टीले रास्वपाकै शैलीमा वरिष्ठ नेता राख्ने भएको छ। सुदनलाई भित्र्याउनुका पछाडि श्रम संस्कृतिको नजर भने स्थानीय र प्रदेश सभाको चुनावमा देखिन्छ।
हर्क लोकप्रिय छन् तर उनको ठाडो शैलीका कारण पार्टीमा संगठन व्यवस्थापन गर्न सक्ने नेताको खाँचो परेको सो पार्टीका अन्य नेताहरूको बुझाइ छ। सुदनले त्यो खाँचो पूरा गरिदिने संकेत उनीहरूले गरे।
‘सुदनजीको कोसी मात्र होइन, देशभर प्रभाव राम्रो छ, मन्त्री भएको, पटकपटक सांसद भएकोले त्यो अनुभव हामीलाई आवश्यक छ,’ श्रम संस्कृति पार्टीका ती नेताले भने, ‘अब स्थानीय र प्रदेश सभाको चुनावमा केन्द्रित हुँदा त्यो अनुभव हामीलाई अझ ज्यादा आवश्यक पर्छ।’
चुनावताका बालेन्द्र शाहसँग एकता गरेर रास्वपाले प्रतिनिधि सभामा दुई तिहाइ सिट जितेको देखेका हर्कले सुदन लगायतलाई पार्टीमा भित्र्याएर कोसीमा स्थानीय र प्रदेश सभाको चुनावमा जित्ने रणनीति बनाएका छन्।
किरातीलाई कोसी प्रदेशको मुख्यमन्त्री प्रस्ताव गरेर जान पनि साम्पाङ तयार छन्।
‘उहाँलाई मुख्यमन्त्री बनाउनपर्छ भन्ने जनताको दबाब छ, सायद त्यही हुन्छ होला,’ श्रम संस्कृतिका ती नेताले भने।
महासचिव आरेन राईले भने त्यसबारे निष्कर्षमा नपुगिएको दाबी गरे।
