वीरगञ्ज । वीरगञ्ज नाका हुँदै चालु आर्थिक वर्षको नौ महिनामा ७९ अर्ब ५४ करोड मूल्य पर्ने वस्तु तथा सामान विदेशी मुलुकमा निर्यात भएको छ । वीरगञ्ज भन्सार कार्यालयका अनुसार गत आर्थिक वर्षको नौ महिनाको तुलनामा चालु आर्थिक वर्षको सोही अवधिमा भने १० अर्ब १९ करोड अर्थात् १५ प्रतिशत बढी आयात भएको हो ।
जबकि गत आर्थिक वर्षको नौ महिनामा भने ६९ अर्ब ३५ करोड मूल्य बराबरको वस्तु तथा सामान विदेशी मुलुकमा निर्यात भएको थियो । वीरगञ्ज भन्सार कार्यालयका सूचना अधिकारी उदयसिंह विष्टले चालु आर्थिक वर्षमा यो नाका हुँदै १५ प्रतिशत निर्यात बढेको बताए ।
यो नाका हुँदै चालु आर्थिक वर्षको नौ महिनामा ४३ अर्ब ६१ करोड मूल्य पर्ने भटमासको तेल प्रशोधित निर्यात भएको छ । जबकि गत आर्थिक वर्षको सोही अवधिमा भने ३६ अर्ब ६२ करोड मूल्य पर्ने भटमासको तेल प्रशोधित निर्यात भएको थियो ।
चालु आर्थिक वर्षको नौ महिनामा पाँच अर्ब ८४ करोड मूल्य पर्ने फलफूलको जुस विदेशी मुलुकमा निर्यात भएको छ भने गत आर्थिक वर्षको सोही अवधिमा भने पाँच अर्ब ७७ करोड मूल्य बराबरको निर्यात भएको थियो ।
त्यस्तै चालु आर्थिक वर्षको नौ महिनामा पाँच अर्ब २४ करोड मूल्यको प्रशोधित पाम तेल निर्यात भयो भने गत आर्थिक वर्षको सोही अवधिमा भने ५९ करोड मूल्यको मात्रै भएको थियो ।
चालु आर्थिक वर्षको नौ महिनामा रु पाँच अर्ब पाँच करोड मूल्य पर्ने सूर्यमुखीको प्रशोधित तेल निर्यात भयो भने गत आर्थिक वर्षको सोही अवधिमा भने छ अर्ब ६१ करोड मूल्यको भएको थियो ।
चालु आर्थिक वर्षको नौ महिनामा दुई अर्ब ६९ करोड मूल्यको विभिन्न किसिमका कपडा निर्यात भयो । त्यस्तै चालु आर्थिक वर्षको नौ महिनामा एक अर्ब ९४ करोड मूल्य पर्ने सिन्डिकेट यार्न निर्यात भएको वीरगञ्ज भन्सारले जनाएको छ ।
