भरतपुर । नेकपा एमालेको एघारौँ महाधिवेशनमा चितवनबाट प्रतिस्पर्धा गरेका नेतामध्ये केन्द्रीय सदस्यमा आठ जना निर्वाचित भएका छन् । पूर्वपोलिटब्युरो सदस्य देवीप्रसाद ज्ञवाली, बालिका गिरी, पूर्वकेन्द्रीय सदस्यहरू पार्वती रावल, यमबहादुर परियार, कृष्णभक्त पोखरेल, जगन्नाथ थपलिया, प्रभा बराल र युवा नेता निशा अधिकारी केन्द्रीय सदस्यमा निर्वाचित भएका हुन् ।
रावल महिला खुलाबाट, अधिकारी बागमती प्रदेश युवा, बराल बागमती प्रदेश महिलाबाट निर्वाचित भएका हुन् । ज्ञवाली, पोखरेल र थपलिया खुला केन्द्रीय सदस्यमा निर्वाचित भएका हुन् । पूर्वजिल्ला अध्यक्ष रामप्रसाद न्यौपाने बागमती प्रदेश खुला, पूर्वकेन्द्रीय सदस्य कपिलप्रसाद पोखरेल र अर्का नेता पुरूषोत्तम न्यौपानेले खुला केन्द्रीय सदस्य पदमा उमेदवारी दिएका थिए ।
चितवनका रामबहादुर थापा बादल नेकपा (एमाले)को उपाध्यक्षमा निर्वाचित भएका छन् । चितवनका सुरेन्द्र पाण्डे भने महासचिव पदमा पराजित भए । यस्तै, अनुशासन आयोगको अध्यक्षमा चितवनका काशिनाथ अधिकारी सर्वसम्मत निर्वाचित भएका छन् ।
यस्तै, केन्द्रीय अनुशासन आयोगको सदस्यमा चितवनका कृष्ण भूर्तेल र कृष्णप्रसाद सिलवाल विजयी भएका छन् ।
