चितवनको राप्ती नगरपालिका का मेयर शमशेर लामा ले नयाँ राजनीतिक दलहरूको उदयसँगै पुराना दलहरूले पनि आफूलाई सुधार गर्नुपर्ने सन्देश दिएका छन्।
बुधवार साँझ आफ्नो सामाजिक सञ्जालमार्फत कविता सार्वजनिक गर्दै मेयर लामाले राजनीतिक परिवर्तनको संकेत देखिएको उल्लेख गरेका हुन्। उनले जनताले अब पुराना वाचा र शैलीप्रति विश्वास घटाउँदै नयाँ विकल्पतर्फ हेर्न थालेको संकेत गर्दै कविता लेखेका छन्।
मेयर लामाले लेखेको कवितामा जनताको आवाज अब गाउँ–शहरमा गुञ्जिन थालेको र पुराना शक्तिहरूको प्रभाव क्रमशः घट्दै गएको भाव व्यक्त गरिएको छ। उनले परिवर्तनको लहर जनताकै आवाजबाट उठिरहेको उल्लेख गर्दै नयाँ बाटो खोज्ने प्रयास सुरु भएको सन्देश दिएका छन्।
उनले लेखेको कवितामा भनिएको छ–
“सकियो अब पुरानो दबदबा गाउँ–शहरमा,
जनताको नयाँ आवाज गुन्जियो घर–घरमा।
पुराना शक्तिको समय अब ढल्दै गयो,
परिवर्तनको लहर उठ्यो जनताको स्वरमा।
वर्षौँका वाचा आज जनताले सम्झिए,
अब विश्वास छैन उही पुराना भरमा।
नयाँ बाटो खोज्दै जनता अघि बढे,
नयाँ इतिहास लेखिँदैछ आज यही दौरमा।”
मेयर लामाको यो कवितालाई सामाजिक सञ्जालमा राजनीतिक सन्देशका रूपमा पनि हेरिएको छ। पछिल्लो समय देशभर नयाँ राजनीतिक शक्तिहरूको उदय र त्यसले पुराना दलहरूलाई चुनौती दिइरहेको सन्दर्भमा उनको अभिव्यक्तिलाई अर्थपूर्ण रूपमा लिइएको छ।
स्थानीय तहका प्रमुखको रूपमा कार्यरत लामाले कविता मार्फत जनभावना र समसामयिक राजनीतिक अवस्थाप्रति आफ्नो धारणा व्यक्त गरेको भन्दै सामाजिक सञ्जाल प्रयोगकर्ताहरूले विभिन्न प्रतिक्रिया दिएका छन्।
