काठमाण्डौ – नवनियुक्त उद्योग, वाणिज्य तथा आपूर्तिमन्त्री दीपककुमार साहले पद तथा गोपनीयताको शपथ ग्रहण गर्नुभएको छ ।
प्रधानमन्त्री वालेन्द्र शाहको सिफारिसमा राष्ट्रपति रामचन्द्र पौडेलले साहलाई उद्योग, वाणिज्य तथा आपूर्तिमन्त्री नियुक्त गर्नुभएको हो । राष्ट्रपति भवन शीतलनिवासमा हिजो बेलुकी भएको समारोहमा राष्ट्रपति पौडेलले नवनियुक्त मन्त्री साहलाई पद तथा गोपनीयताको शपथ गराउनुभएको हो ।
साह सुनसरी क्षेत्र नम्बर ४ बाट प्रतिनिधिसभामा निर्वाचित सांसद हुनुहुन्छ । यसअघि उद्योग, वाणिज्य तथा आपूर्तिमन्त्री रहनुभएकी गौरीकुमारी यादवले हिजो नै पदबाट राजीनामा दिनुभएको थियो ।
काठमाण्डौ उपत्यकामा लामो समयदेखि खाना पकाउने एलपी ग्यासको अभाव भइरहेका बेला अस्ति संसदीय समितिको बैठकमा ग्यास उद्योगीप्रति दिएको अभिव्यक्तिपछि यादव आलोचनामा पर्नुभएको थियो ।
उद्योग समितिको बैठकमा उहाँले ग्यास आपूर्ति सहज बनाउन उद्योगीको भूमिकामाथि प्रश्न उठाउँदै कडा अभिव्यक्ति दिनुभएको थियो । राजीनामापछि रिक्त भएको मन्त्रालयको जिम्मेवारी साहलाई दिइएको हो । शपथ लिएलगत्तै मन्त्री साहले मन्त्रालय पुगेर पदभारसमेत ग्रहण गर्नुभएको छ ।
पदभार ग्रहण गर्दै उहाँले विगतका काम र प्रगतिको जानकारी लिएर मन्त्रालयको काम अघि बढाउने बताउनुभएको छ । ग्यास आपूर्तिका विषयमा भने मन्त्रालयभित्र छलफल गरेर नागरिकको आवश्यकता अनुसार काम गर्ने उहाँको भनाइ छ ।
