विश्व बजारमा सेमीकन्डक्टरको मागमा भएको अभूतपूर्व वृद्धिका कारण गएको अगस्ट महिनामा दक्षिण कोरियाको निर्यात ६८.७ प्रतिशतले बढेको छ ।
व्यापार, उद्योग तथा स्रोत मन्त्रालयका अनुसार अगस्टमा दक्षिण कोरियाको निर्यात बढेर ९८ अर्ब २५ करोड अमेरिकी डलर अर्थात् १४ खर्ब ९३ अर्ब रुपैयाँ पुगेको चिनियाँ समाचार संस्था सिन्ह्वाले जनाएको छ ।
योसँगै लगातार तेस्रो महिना दक्षिण कोरियाको मासिक निर्यात ९० अर्ब डलरभन्दा माथि रहेको छ ।
यस अवधिमा दैनिक औसत निर्यात ७२.५ प्रतिशतले बढेर ४ अर्ब ४७ करोड डलर पुगेको छ । दैनिक औसत निर्यात लगातार चौथो महिना ४ अर्ब डलरभन्दा माथि कायम रहेको छ ।
अगस्ट महिनामा दक्षिण कोरियाको आयात २२.५ प्रतिशतले बढेर ६३ अर्ब ५१ करोड डलर पुगेको छ । यससँगै देशको व्यापार बचत ३४ अर्ब ७५ करोड डलर पुगेको छ । व्यापार बचत लगातार तेस्रो महिना ३० अर्ब डलरभन्दा माथि रहेको छ ।
दक्षिण कोरियाका २० प्रमुख निर्यात वस्तुमध्ये १४ वटाको निर्यात बढेको छ । तीमध्ये सेमीकन्डक्टरको निर्यात सबैभन्दा धेरै २०९ प्रतिशतले वृद्धि भई ४६ अर्ब ६५ करोड डलर पुगेको छ । यो सेमीकन्डक्टर निर्यातको अहिलेसम्मकै उच्च स्तर हो ।
सेमीकन्डक्टरको निर्यात लगातार तीन महिना ४० अर्ब डलरभन्दा माथि रहेको छ । विश्वका ठूला प्रविधि कम्पनीहरू गुगल र अमेजनलगायतले कृत्रिम बुद्धिमत्ता अर्थात् ‘एआई’ पूर्वाधारमा लगानी विस्तार गरिरहेकाले मेमोरी चिपको मूल्य बढ्दा निर्यात वृद्धिमा योगदान पुर्याएको मन्त्रालयले जनाएको छ ।
अमेरिकातर्फको निर्यात ८९.३ प्रतिशतले बढेर १६ अर्ब ५० करोड डलर पुगेको छ । दक्षिणपूर्वी एशियाली राष्ट्रहरूको सङ्गठन (आसियान) तर्फको निर्यात ७५.४ प्रतिशतले बढेर १९ अर्ब ९ करोड डलर पुगेको छ भने युरोपेली सङ्घतर्फको निर्यात १४.६ प्रतिशतले बढेर ६ अर्ब ६२ करोड डलर पुगेको छ ।
आयाततर्फ कच्चा तेल, प्राकृतिक ग्यास र कोइलासहित तीन प्रमुख ऊर्जा स्रोतको आयात १५.३ प्रतिशतले बढेर १२ अर्ब ६८ करोड डलर पुगेको छ ।
सेमीकन्डक्टर उत्पादन उपकरण बलियो मागका कारण गैरऊर्जा वस्तुको आयात पनि २४.४ प्रतिशतले बढेर ५० अर्ब ८३ करोड डलर पुगेको मन्त्रालयले जनाएको छ ।
