काठमाण्डौ – भोटेकोशी र त्रिशूलीको बाढीमा परेर ज्यान गुमाएकाहरूको शव व्यवस्थापनमा समस्या भएपछि सरकारले ‘एयरटाइट ब्याग’मा राखेर जमिनमुनि गाड्न थालेको छ ।
शवको अन्त्येष्टि गर्न लागिएको भनी सामाजिक सञ्जालमार्फत भ्रामक सूचना फैलिएपछि नेपाल प्रहरीले भिडियो सन्देश जारी गर्दै शवको अस्थायी व्यवस्थापन मात्रै गर्न लागिएको स्पष्ट पारेको छ ।
पहिचान नभएका तथा बेवारिसे शव व्यवस्थापन (पहिलो संशोधन) निर्देशिका, २०८३ बमोजिम ‘एयरटाइट ब्याग’मा राखेर जमिनमुनि व्यवस्थापन गर्न थालिएको प्रहरीले जनाएको छ ।
लामो समयसम्म शव बाह्य वातावरणमा रहँदा सड्ने प्रक्रियामा तीव्रता आई पानीका स्रोतलगायत विभिन्न माध्यमबाट महामारीको जोखिमसमेत बढ्न सक्ने भन्दै प्रहरीले यो प्रक्रियालाई शव दाहसंस्कार गर्न लागिएको रूपमा बुझ्नु नहुने स्पष्ट पारेको छ ।
यसलाई भविष्यमा सनाखत भएमा सम्बन्धित परिवारले शव प्राप्त गर्न सक्ने गरी सुरक्षित राखिएको भनी बुझ्न प्रहरीले आग्रह गरेको छ । निर्धारित ठाउँमा शवहरूलाई सम्मानजनक तथा सुरक्षित रूपमा जमिनमुनि व्यवस्थापन गर्दा हरेक शवको कोड नम्बर जमिनमुनि तथा माथि राखी शव व्यवस्थापन गरिएको ठाउँको जिपिएस लोकेसन, फोटो अभिलेख, नक्सासहितको विस्तृत विवरण तथा व्यवस्थापनसम्बन्धी सम्पूर्ण विवरण अभिलेखीकरण गरिएको प्रहरीले जनाएको छ ।
