८ भदौ, काठमाडौं । नेपाली ब्रान्ड यात्रीले आफ्नो नयाँ विद्युतीय स्कुटर ‘यात्री पी-२’ सार्वजनिक गरेको छ ।
सिप्रदी यात्रीले नेपालमै डिजाइन तथा उत्पादन गरेको पी-२ लाई विभिन्न ब्याट्री विकल्प सहित बजार ल्याएको हो ।
पी-२ लाई तीन फरक ब्याट्री क्षमतामा उपलब्ध गराइएको छ । कम्पनीका अनुसार ग्राहकले ५.२ किलोवाट आवर, ३.७ किलोवाट आवर र ३ किलोवाट आवर क्षमताका ब्याट्रीमध्ये विकल्प रोज्न सक्नेछन् ।
सबैभन्दा ठूलो ५.२ किलोवाट आवर ब्याट्री भएको पी-२ ले एक पटक पूर्ण चार्जमा १ सय ५७ किलोमिटरसम्म रेन्ज दिने कम्पनीको दाबी छ ।
त्यस्तै ३.७ किलोवाट आवर ब्याट्री भएको मोडेलले १ सय १२ किलोमिटर र ३ किलोवाट आवर ब्याट्री भएको मोडेलले ९० किलोमिटरसम्म रेन्ज दिने कम्पनीको भनाइ छ ।
३५ स्थानमा डीसी चार्जर
पी-२ को मुख्य विशेषतामध्ये डीसी फास्ट चार्जिङ सपोर्ट पनि छ । सिप्रदी यात्रीले स्कुटरका लागि देशभरि ३५ स्थानमा डीसी चार्जर स्थापना गर्ने जनाएको छ ।
पी-२ ले ३.३ किलोवाट क्षमताको डीसी चार्जर सपोर्ट गर्ने छ । यसले लामो दुरीमा स्कुटर चलाउने ग्राहकलाई चार्जिङको सुविधा विस्तार गर्ने कम्पनीको अपेक्षा छ ।
एन्ड्रोइड अटो र एप्पल कारप्ले
यात्री पी-२ लाई केवल विद्युतीय स्कुटरका रूपमा मात्रै नभई स्मार्ट फिचर सहित बजारमा उतारिएको छ । यसमा एन्ड्रोइड अटो र एप्पल कारप्ले सपोर्ट उपलब्ध छ ।
स्कुटरमा रियल टाइम इनर्जी मिटर तथा स्मार्ट डिस्प्ले पनि राखिएको छ ।
नेपाली सडकमा परीक्षणपछि बजारमा
पी-२ लाई बजार ल्याउनुअघि नेपालका विभिन्न भौगोलिक क्षेत्रमा परीक्षण गरिएको थियो । तराईदेखि पहाडी तथा कठिन सडकसम्म परीक्षण गरिएको कम्पनीले जनाएको छ ।
परीक्षण क्रममा जिरी, काठमाडौं, मुलकोट, कटारी, भरतपुर, वालिङ लगायत क्षेत्रमा स्कुटर चलाइएको थियो ।
सिप्रदी ट्रेडिङ र यात्री मोटरसाइकलको साझेदारीमा विकास भएको पी-२ लाई कम्पनीले नेपालमै डिजाइन, इन्जिनियरिङ र उत्पादन गरिएको विद्युतीय स्कुटरका रूपमा अघि सारेको छ ।
यससँगै नेपालमा आफ्नै डिजाइन र प्रविधिमा विद्युतीय दुई पाङ्ग्रे सवारी उत्पादन गर्ने प्रयासले थप व्यावसायिक रूप लिएको छ । पी-२ उत्पादनका लागि सिप्रदी यात्रीले उत्पादन प्लान्टमा करिब ६० करोड रुपैयाँ लगानी गर्ने र वार्षिक ५० हजार युनिटसम्म उत्पादन गर्ने योजना अघि सारेको छ ।
