९ भदौ, काठमाडौं । गुगलको ‘एन्ड्रोइड पल्स’ नामको एप केही एन्ड्रोइड फोनमा प्ले स्टोरको अपडेट सूचीमा देखिन थालेको छ ।
तर, यो फेसबुक, टिकटक वा क्यामेराजस्तो प्रयोगकर्ताले खोलेर चलाउने एप होइन । यो फोनको ब्याकग्राउन्डमा बसेर काम गर्ने गुगलको सर्भिस हो, जसले फोन तथा एपहरूले ब्याट्री, मेमोरी र फोनमा के असर गरिरहेको छन् भनेर बुझ्छ । तिनमा काम गर्ने क्षमता अस्वाभाविक रूपमा प्रयोग गरिरहेका छन् कि छैनन् भन्ने पत्ता लगाउन सहयोग गर्छ ।
गुगलले प्ले स्टोरमा दिएको विवरणअनुसार एन्ड्रोइड पल्सले फोनको महत्वपूर्ण स्रोत बढी वा अस्वाभाविक रूपमा खपत भइरहेको अवस्था पहिचान गर्न आवश्यक नियम उपलब्ध गराउँछ ।
सामान्य भाषामा भन्नुपर्दा, कुनै एपले अचानक धेरै ब्याट्री सकाउन थाल्यो, फोनलाई धेरै तातो बनायो, धेरै मेमोरी खायो वा ब्याकग्राउन्डमा अनावश्यक रूपमा चलिरह्यो भने त्यस्तो गतिविधि पहिचान गर्न यसले एन्ड्रोइडलाई सहयोग गर्छ ।
