नेकपा एमाले बागमती प्रदेश संसदीय दलको नेता जगन्नाथ (जेएन) थपलियालाई हटाउने अविश्वासको प्रस्ताव दर्ता गरेको छ । थपलियाविरुद्ध एमाले प्रदेश संसदीय दलको कार्यालयमा अविश्वासको प्रस्ताव बुधबार दर्ता भएको हो । ‘१८ जनाको हस्ताक्षरसहित दलको नेता परिवर्तनका लागि अविश्वास प्रस्ताव दर्ता भएको छ’, एक नेताले भने, ‘पार्टीको निर्देशन बमोजिम दलको नेता फेर्ने प्रक्रिया अगाडि बढाइएको हो ।’
थापाको पक्षबाट चितवनकै दुई सांसद कृष्णप्रसाद सिलवाल, हरि सापकोटाले एमाले संसदीय दलको कार्यालयमा अविश्वास प्रस्ताव दर्ता गराएका हुन् । केही समय अघि भक्तपुरको गुण्डुमा संकलन गरिएको हस्ताक्षर प्रतिनिधि मार्फत दलको सचिवालयमा दर्ता गरिएको बताइएको छ । उक्त दर्ता भएको अविश्वास प्रस्ताव एमाले संसदीय दलको विधानतः ७ दिन भित्र संसदीय दलको बैठक बसेर छलफल गर्नुपर्ने व्यवस्था रहेको छ । सांसद कृष्ण सिलवालले अविश्वासको पक्षमा आफूले यसअघिनै हस्ताक्षर गरिसकेको नारायणी अनलाइनलाई जानकारी दिए । उनले थप बिषयमा संसदिय दलको कार्यालयमा सम्पर्क गर्न आग्रह गर्दै आफूलाई जानकारी नभएको प्रतिकृया दिए ।
एमाले दल नेताको विषयमा केही समय अघि देखि विवाद हुँदै आएको थियो । उक्त विषयमा पटक पटक एमाले अध्यक्ष केपी शर्मा ओली निवासमा छलफल भएको थियो ।
