चितवन–१ मा नेपाली कम्युनिष्ट पार्टी (नेकपा)का डा. कृष्णराज पन्त उम्मेदवार बनेका छन् । पूर्व माओवादी केन्द्रको कमजोर प्रभाव क्षेत्र मानिने यो क्षेत्रमा नेकपा (एकीकृत समाजवादी)ले कांग्रेसको समेत सहयोगमा २०७९ मा राप्ती नगरपालिका जितेको थियो ।
माओवादी केन्द्र र एकीकृत समाजवादी मिलेर नेकपा बन्नु अघि डा. पन्त एकीकृत समाजवादीकै नेता थिए । अघिल्लो निर्वाचनमा कांग्रेसको साथ पाएको नेकपाले यसपटक एक्लै चुनाव लडेको छ ।
पहिलोपटक संसदीय चुनावमा उम्मेदवार बनेका पन्त २०२२ सालमा धादिङमा जन्मिएका हुन् ।
राप्ती नगरपालिका वडानम्बर २ निवासी पन्तले जवाहरलाल नेहरु विश्वविद्यालयबाट अर्थशास्त्रमा विद्यावारिधी गरेका छन् । २०७८ मा उनी बागमती प्रदेश सरकारको प्रदेश नीति तथा योजना आयोगको उपाध्यक्ष भए ।
Battleground Analysis
अनुकूलता
- उच्च प्राज्ञिक छवि
- नीतिगत र योजनाबद्ध अनुभव
- लामो राजनीतिक इतिहास
- स्थानीय आधार
प्रतिकूलता
- कमजोर सांगठनिक आधार
- गठबन्धनको अभाव
- ‘हेभीवेट’ प्रतिस्पर्धीहरू
- पहिलो संसदीय अनुभव
२०३५ सालमा अनेरास्ववियूबाट राजनीति सुरु गरेका पन्त एमाले चितवनको जिल्ला कमिटी सदस्य, राष्ट्रिय युवा संघको सदस्य, एमाले आर्थिक तथा योजना विभाग सदस्य, नेकपाको निर्वाचन आयोग सदस्य, एकीकृत समाजवादीको पोलिट्ब्यूरो सदस्य र अहिले नेकपाको केन्द्रीय सदस्य छन् ।
२०७९ को निर्वाचनमा समानुपातिकमा माओवादी केन्द्रले ४ हजार ९६५ र एकीकृत समाजवादीले ३ हजार ५१८ मत पाएको थियो ।
कांग्रेस, एमाले र रास्वपा जस्ता दलहरुसँग प्रतिस्पर्धा गरेर जित निकाल्नु डा. पन्तका लागि कठिन देखिन्छ तथापी उनले पार्टीको परीक्षण जनताको बीचमा भने गर्न सक्नेछन् ।
