अघिल्लो निर्वाचनमा ‘हेभिवेट’ नेताहरूलाई हराएर ढकाल चर्चामा आएका थिए । तर, जितेर गएपछि क्षेत्रका लागि कुनै काम नगरेको आरोप र मतदाताको असन्तुष्टि ढकालका लागि मुख्य चुनौती बनेको छ।
०००
२०७९ सालको निर्वाचनमा नेपाली कांग्रेस र नेकपा एमालेका नेतालाई पराजित गरेर चर्चामा आएका राष्ट्रिय स्वतन्त्र पार्टी (रास्वपा) का हरि ढकाल दोस्रो पटक चितवन–१ बाट उम्मेदवारी दिएका छन् । एमालेका निवर्तमान उपाध्यक्ष सुरेन्द्र पाण्डे र कांग्रेसका डा. विश्व पौडेललाई पराजित गरेका ढकालले ‘सरप्राइज’ जित निकाले ।
पूर्वी चितवनको रत्ननगर–१५, पिठुवामा २०४० सालमा जन्मिएका ढकाल रास्वपा केन्द्रीय सदस्य छन् । उनी एमाले पृष्ठभूमिबाट आएका हुन् । विद्यालय र क्याम्पसमा पढ्दा उनी एमालेको विद्यार्थी संगठन अनेरास्ववियुमा आवद्ध भए । ढकाल अनेरास्ववियु चितवनको सचिव समेत बने ।
Battleground Analysis
अनुकूलता
- साविक विजेता, भारी मतान्तर
- पार्टीको सांगठनिक आधार
- जुझारु छवि
प्रतिकूलता
- “जिताएर पठाए पनि केही भएन” भन्ने भाष्य
- पाका र अनुभवी उम्मेदवारको चुनौती
- मतदाताको फेरिएको मनोविज्ञान
व्यवसायमा विभिन्न आरोह अवरोह भोगेका उनी राजनीति र व्यवसाय छाडेर आध्यात्मिक मार्गमा समेत लागे केही समय । योग, ध्यान र तपस्याका विभिन्न कार्यक्रममा सक्रिय रहे ।
२०७९ सालमा भएको प्रतिनिधिसभाको निर्वाचनमा चितवन क्षेत्र नं. १ बाट ३४ हजार १८९ मतसहित विजयी भएका थिए । समानुपातिकमा रास्वपाले ३४ हजार ६९१, एमालेले २४ हजार ६ र कांग्रेसले १६ हजार ६९५ मत पाएको थियो ।
दोस्रोपटक चितवन–१ बाट उठेका ढकालले निर्वाचन जितेपछि आफ्नो निर्वाचन क्षेत्रमा काम नगरेको भनेर आलोचना खेपेका छन् । त्यही भएर उनलाई अघिल्लो बेलाको जस्तो सहज अवस्था छैन । अघिल्लोपटक यो क्षेत्रमा घण्टीमा भोट दिँदा रवि लामिछानेलाई जान्छ भन्ने हल्ला चलाइएको थियो । रुष्ट बनेका मतदाता ढकालका लागि चुनौती बन्न सक्छ ।
अघिल्लो निर्वाचनमा जस्तो एमाले नेता सुरेन्द्र पाण्डे र कांग्रेसका डा. विश्व पौडेल जस्ता ‘हेभिवेट’ उम्मेदवार नहुनु ढकालका लागि अनुकूलता हो ।
हालको दल
