इन्डोनेसियामा फैलिएको भीषण डढेलोका कारण उत्पन्न तुवाँलो र वायु प्रदूषणले दक्षिण–पूर्वी एसियाली देशहरूमा गम्भीर असर पारेको छ ।
सुमात्रा र कालिमान्तान टापुका हजारौँ हेक्टर वन तथा दलदले भूमिमा हप्तौँदेखि लागिरहेको डढेलो नियन्त्रण बाहिर जाँदा त्यसको प्रत्यक्ष प्रभाव छिमेकी देशहरु सिंगापुर र मलेसियामा समेत देखिएको हो ।
खासगरी पाम आयल खेतीका लागि अवैध रूपमा वन फाँड्ने र आगो लगाउने मानवीय गतिविधि तथा लामो खडेरीका कारण डढेलो तीव्र रूपमा फैलिएको स्थानीय अधिकारीहरुलाई उद्धृत गर्दै बीबीसीले जनाएको छ ।
दलदले जमिनको सतहमुनि सल्किने आगोका कारण नियन्त्रण प्रयास जटिल बनेको छ । इन्डोनेसियाबाट मौसमी हावाले बगाएर ल्याएको बाक्लो विषालु धुवाँका कारण छिमेकी देश सिंगापुरको वायु प्रदूषण सूचकाङ्क अस्वस्थ तहमा पुगेको छ ।
आकाश तुवाँलोले ढाकिएपछि सिंगापुर सरकारले सर्वसाधारणलाई घरभित्रै रहन र बाहिर निस्कँदा उच्चस्तरीय मास्क प्रयोग गर्न स्वास्थ्य चेतावनी जारी गरेको छ ।
डढेलो प्रभावित क्षेत्रहरूमा श्वासप्रश्वासका बिरामी बढेका छन् भने सयौँ विद्यालयहरू बन्द गरिएका छन् । सीमापार वायु प्रदूषण बढेपछि दक्षिण–पूर्वी एसियाली राष्ट्रहरूको सङ्गठन (आसियान) ले डढेलो नियन्त्रण र कडा कानुन कार्यान्वयनका लागि इन्डोनेसियामाथि कूटनीतिक दबाब बढाएको छ ।
