चितवन । राप्ती नगरपालिका–४ डडुवास्थित वडा कार्यालय चोकदेखि वडा नं. ४ र ५ जोड्ने भवानिपुर नयाँ पुलसम्मको सडक स्तरोन्नति गर्ने प्रक्रिया अघि बढेको छ। उक्त सडकको दुवैतर्फ नालासहित स्तरोन्नति गर्ने उद्देश्यले सर्वेक्षणको काम सुरु गरिएको हो।
उक्त सडक लामो समयदेखि जीर्ण अवस्थामा रहँदा स्थानीयवासीले आवतजावतमा सास्ती खेप्दै आएका थिए। अब भने करिब १ हजार ५८० मिटर लम्बाइको भागमा सडक स्तर उन्नति हुने भएको छ । सडकको दुरावस्थाका कारण खाल्डाखुल्डी बढेको तथा सहज रूपमा आवतजावत गर्न कठिनाइ देखिएको थियो।
सडकको अवस्थाबारे जानकारी लिँदै स्तरोन्नतिको प्रक्रिया अघि बढाउन भौतिक पूर्वाधार कार्यालय, भरतपुर चितवनका प्रमुख वीरेन्द्र चौधरीसहितको उपस्थितिमा सर्वेक्षण सुरु गरिएको छ । सर्वेक्षणपछि आवश्यक प्रक्रिया पूरा गरी सडक स्तरोन्नतिको काम अघि बढ्ने स्थानीयको अपेक्षा छ।
यस सडकको दुरावस्थाबारे जन निकास मिडियाले पटक–पटक समाचार प्रकाशन तथा प्रसारण गर्दै सम्बन्धित निकायको ध्यानाकर्षण गराउँदै आएको थियो। स्थानीयले भोग्दै आएको समस्यालाई सार्वजनिक गर्दै सडकको नियमित मर्मतसम्भार र स्तरोन्नतिको आवश्यकता औँल्याइएको थियो।
विशेषगरी प्रदेश सरकारले सडक कालोपत्रे गर्न बजेट विनियोजन गरे पनि निर्माण सम्पन्न भएका सडकको नियमित मर्मतसम्भारका लागि पर्याप्त बजेट छुट्याउने विषयमा ध्यान नदिएको भन्दै जन निकास मिडियाले पटक–पटक आवाज उठाउँदै आएको थियो। सडक निर्माणमा मात्रै सीमित नभई त्यसको दीर्घकालीन संरक्षण र नियमित मर्मतसम्भारलाई पनि प्राथमिकता दिनुपर्ने विषयमा समेत सञ्चारमाध्यममार्फत ध्यानाकर्षण गराइएको थियो।
सडक स्तरोन्नतिका लागि सर्वेक्षण सुरु भएसँगै स्थानीयवासीमा आशा पलाएको छ। सडक दुवैतर्फ नालासहित स्तरोन्नति भए वर्षायाममा पानीको उचित निकास हुनुका साथै आवतजावत सहज हुने र सडकको टिकाउपनमा समेत सुधार आउने विश्वास गरिएको छ।
स्थानीय पूर्वाधारको विकाससँगै निर्माण भइसकेका सडकको संरक्षणमा पनि सम्बन्धित निकायले नियमित ध्यान दिन सके यस्ता समस्या दोहोरिन नदिन सहयोग पुग्नेछ।
