अन्तर्राष्ट्रिय सुरुङ उद्धारविज्ञ प्राध्यापक आर्नोल्ड डिक्सले जलविद्युत आयोजनाका सुरुङहरूमा भैरहेका उद्धार अभियान आफ्नो जीवनकै सबैभन्दा कठिन परीक्षा भएको बताउनुभएको छ ।
उद्धार अभियानको नेतृत्व र प्राविधिक परामर्शमा व्यस्त अस्ट्रेलियाली भूगर्भविद् तथा इन्जिनियर डिक्सले सामाजिक सञ्जालमार्फत आफ्नो अनुभव र सन्देश सार्वजनिक गर्दै यस्तो बताउनुभएको हो । उद्धार कार्यमा आशा, अनुशासन, करुणा र कर्तव्यलाई प्राथमिकतामा राख्नुपर्ने उहाँको भनाइ छ ।
नेपालको अहिलेको परिस्थिति आफूले यसअघि कहिल्यै सामना नगरेको अवस्थाजस्तो रहेको पनि उल्लेख गर्नुभएको छ । भारतको सिल्क्यारा सुरुङ उद्धारको स्मरण गर्दै उहाँले त्यहाँ सुरुङभित्र फसेका ४१ जनालाई जीवितै उद्धार गर्नु असम्भवजस्तै देखिएको काम भए पनि सामूहिक प्रयासबाट सफलता प्राप्त भएको स्मरण गर्नुभएको छ ।
त्यो अनुभव स्मरण गर्दै उहाँले ‘असम्भवजस्तो देखिनु’ र ‘वास्तवमै असम्भव हुनु’ फरक कुरा भएको बताउनुभएको छ । उहाँले लेख्नुभएको छ, ‘परीक्षा केवल हामी सफल हुन्छौँ कि हुँदैनौँ भन्ने होइन । बाटो झन् कठिन बन्दै जाँदा, जिम्मेवारीहरू बढ्दै जाँदा र परिणाम के हुन्छ भन्ने थाहा नहुँदा पनि हामी सही काम गरिरहन्छौँ कि रहँदैनौँ भन्ने हो ।’
