काठमाडौं । चीनबाट ५० टन राहत सामाग्री बोकेका दुई ठूला चिनियाँ विमान काठमाडौं आइपुगेका छन् ।
काठमाडौंस्थित चिनियाँ दूतावासका अनुसार ती विमान आइतबार बिहान करिब ७ बजे आपत्कालीन राहत सामग्री लिएर आएका हुन् ।
ती विमानहरू चेङ्दु सुआङलिउ अन्तर्राष्ट्रिय विमानस्थलबाट उडान भरी करिब तीन घण्टाको उडानपछि काठमाडौं आइपुगेका हुन् ।
ती विमानहरूमा पाल (टेन्ट), कम्बल, स्लिपिङ ब्याग, सुक्खा खाना र प्राथमिक उपचार किटहरू गरी कुल ५० टन तौलका १३ हजार २०० थान आपत्कालीन राहत सामग्रीहरू ल्याइएको चिनियाँ दूतावासले जनाएको छ ।
विमानमा चारजना चिनियाँ सुरङ उद्धार विशेषज्ञहरू र उद्धार सामग्रीहरू पनि आएका छन् ।
नेपालका लागि चिनियाँ राजदूत झाङ माओमिङले ती राहत सामाग्री विज्ञान, प्रविधि तथा नवप्रवर्तनमन्त्री महावीर पुन, तथा नेपालको संघीय संसद्का प्रतिनिधिसभा सदस्य धर्म केसीलाई हस्तान्तरण गरेका छन् ।
