भरतपुर, साउन १७-
पाकिस्तानको ब्रड पिक हिमालमा गएको भीषण हिमपहिरोमा परी निधन भएका कीर्तिमानी पर्वतारोही निर्मल पुर्जा ‘निम्स दाइ’को रामनगरस्थित घर शोकमग्न बनेको छ । चितवनको भरतपुर महानगरपालिका–१ रामनगरमा निम्स दाइको घर रहेको छ ।
उक्त घरमा पछिल्लो समय उनका माइलो दाइको परिवार बस्दै आएको छ । निम्स दाइ हिमालमै अस्ताएको खबर आएपछि रामनगर घरमा उनको तस्वीरमा माल्यार्पण गर्नुका साथै दिप प्रज्वलन गरी श्रद्धाञ्जली अर्पण गरिएको छ । आफन्तहरु घरमा पुगेका छन् ।
निम्स दाइको साहस र बाल्यकाल सम्झिँदै आफन्तहरु भावुक बनेका छन् । हिमाल चढ्दा सँधै आफुलाई बताउने गरेको भाईले पाकिस्तान जाँदा केहि खबर नगरेको भनि माइलो दाइ जितबहादुर पुर्जा पुन भक्कानिए । ‘पहिला हिमाल चढ्दा घरमा धुपबत्ती बाल्देउ है दाइ भन्थ्यो । पाकिस्तान जाने बेलामा चाँहि मलाई केहि नभनि गयो’, यति भन्दै उनी भावुक भए ।
निर्मलका चार दाजुभाई र एक बहिनी छन् । बहिनी अष्ट्रेलियामा छन् । निर्मलका बुबा पनि ब्रिटिस आर्मी थिए । म्याग्दीको अन्नपूर्ण गाउँपालिका–२ दानामा जन्मिएका उनले चितवनको आँपटारीस्थित स्मल हेभन स्कुलमा कक्षा ३ देखि १० सम्म पढेका थिए । उक्त स्कुल अहिले कल्याणपुरमा सरेको छ ।
कक्षा १० को टेस्ट परीक्षा दिएपछि उनी एसएलसी नदिइकन लाहुरे बन्न गएका थिए । ब्रिटिस आर्मीको जागिर छाडेका निम्स दाइले १४ वटा भीमकाय हिमालहरू चढेर विश्व किर्तिमान बनाएका छन् । ४० वर्ष अघि उनको परिवार चितवन बसाईसरेर आएको थियो ।
स्मल हेभन स्कुलमा २०५२ सालदेखि काम गर्दै आएका प्रशासकिय अधिकृत धर्मराज घिमिरेका अनुसार निर्मल पुर्जा २०५१ सालमा कक्षा ३ मा भर्ना भएका थिए । उनीसँगै बहिनी अनिता पनि सोहि स्कुलमा भर्ना भएकी थिइन् । निर्मलले त्यहाँ कक्षा १० सम्म पढे । ‘खेलकुद लगायतका अतिरिक्त क्रियाकलापमा उनी अब्बल थिए । म निर्मलसँग अलि नजिक पनि थिए’, स्कुलको प्रशासनमा काम गर्ने कर्मचारी घिमिरेले भने, ‘अग्रजलाई असाध्यै समान्न गर्ने मान्छे थियो । विश्व रेकर्ड बनाएपछि हामीले सम्मान पनि गरेका थियौँ ।’
निर्मलको सम्मानमा रथयात्रा निकालिएको थियो । ‘दाई र बुबा ब्रिटिस आर्मीमा रहेकाले पनि होला १० कक्षा पढ्दा पढ्दै उनलाई पनि फौजी हुन मन लागेछ । टेस्ट परीक्षा दिएर एसएलसी नदिइकन उनी लाहुरे बन्न गए’, उनले विगत सम्झिँदै भने, ‘विद्यार्थी त धेरै हुन्छन् तर, निर्मल जस्तो विद्यार्थी पाउन गाह्रो हुन्छ ।’
निर्मलको बारेमा बोल्दा बोल्दै उनी भावुक पनि भए । ‘यतिछिट्टै हामीलाई छाडेर गए । धेरै दुःख लागेको छ’, भावुक हुँदै उनले भने, ‘सर तपाईलाई केहि प¥यो भने मलाई सम्झिनु है भनेर भन्थे ।’ चितवन आएका बेला जहिल्यै निर्मलसँग उनको भेट हुन्थ्यो । आफ्नो बुबा वितेका बेला निर्मल रामनगर घर आएका थिए । निर्मलसँग अन्तिम पटक त्यहि भेट भएको थियो घिमिरेको । विश्व किर्तिमान बनाएपछि निर्मलले आफ्नो आमालाई हेलिप्टरमा राखेर हिमालको बेसक्याम्प लगेका थिए ।
निर्मल हिमपहिरोमा परेको खबर घिमिरेले समाचार पढेर थाहा पाएका थिए । ‘निर्मल असाधारण व्यक्ति हो । साहसी मान्छे हो । कुनै न कुनै उपाय अपनाएर हिमपहिरो छलेर बाँच्छन् भन्ने लागेको थियो । तर, हामी सबैलाई छाडेर उनी गए’, उनले भने ।
‘निर्मल सैद्धान्तिक भन्दा पनि अतिरिक्त क्रियाकलापमा बढी अब्बल थिए’, उनलाई गणित विषय पढाएका शिक्षक केशव घिमिरे भन्छन्, ‘खेलकुदमा उनको रुची धेरै थियो । निर्मललाई मैले कक्षा ५ देखि ९ सम्म गणित पढाएँ । उनी एकदमै साहसी व्यक्ति हुन् ।’ उनले स्मल हेभनमा २०५२ सालदेखि २०६२ सालसम्म पढाएका थिए ।
