काठमाण्डौ – मध्यपूर्वका विभिन्न क्षेत्रमा रहेका अमेरिकी गुप्तचर संस्था (सिआइए) का गोप्य केन्द्रहरूमा इरानले गरेको ड्रोन आक्रमणमा रुसले सहयोग गरेको हुन सक्ने आशङ्कामा अमेरिकी अधिकारीहरूले अनुसन्धान थालेका छन् ।
अन्तर्राष्ट्रिय समाचार संस्था रोयटर्सका अनुसार आक्रमणको उच्च सटिकता देखिएपछि इरानलाई रुसले लक्ष्य निर्धारणसम्बन्धी खुफिया सूचना तथा उन्नत ड्रोन प्रविधि उपलब्ध गराएको हुन सक्ने सम्भावनाको अनुसन्धान भइरहेको हो । गत मार्चमा साउदी अरबको राजधानी रियादस्थित अमेरिकी दूतावासभित्र रहेको सिआइए केन्द्र तथा इराकको पूर्वी क्षेत्रमा रहेको अर्को गोप्य केन्द्रमा ड्रोन आक्रमण भएको थियो।
स्रोतहरूका अनुसार अन्य केही सिआइए केन्द्रहरू पनि निशानामा परेका थिए, यद्यपि ती स्थानहरूको विवरण सार्वजनिक गरिएको छैन। अनुसन्धानका क्रममा आक्रमणमा प्रयोग गरिएको इरानको शाहिद–१३६ ड्रोनमा रूसको ‘कमेटा–एम’ नेभिगेसन प्रणाली जडान गरिएको भेटिएको बताइएको छ।
विज्ञहरूका अनुसार उक्त प्रणालीले ड्रोनलाई अझ सटीक बनाउनुका साथै इलेक्ट्रोनिक जामिङबाट बच्न पनि मद्दत गर्छ। अमेरिकी विश्लेषकहरूले आक्रमणका क्रममा रूसबाट प्राप्त लक्ष्य निर्धारणसम्बन्धी सूचना प्रयोग गरिएको थियो वा थिएन भन्ने विषय पनि अध्ययन गरिरहेका छन्।
यद्यपि केही स्रोतले इरानको मुख्य लक्ष्य अमेरिकी दूतावास नै रहेको र सिआइए केन्द्रमा पुगेको क्षति संयोग हुन सक्ने आकलन गरेका छन्। घटनामा कुनै मानवीय क्षति नभएको जनाइएको छ। यस विषयमा ह्वाइट हाउस र सिआइएले औपचारिक प्रतिक्रिया दिएका छैनन्।
