काठमाडौं । नारायणगढ-मुग्लिन सडकखण्डअन्तर्गत चितवनको इच्छाकामना गाउँपालिकाको जलविरेमा दुई बस र एउटा ट्रक आपसमा ठोक्किएका छन् ।
उक्त दुर्द्धटनामा परी २५ जना घाइते भएको प्रहरीले जानकारी दिएको छ । प्रहरीका अनुसार आइतबार (साउन ३) बिहान ७:१० बजे उक्त दुर्घटना भएको हो ।
प्रहरीका अनुसार काठमाडौंबाट दाङतर्फ जाँदै गरेको यात्रुबाहक बस र सर्लाहीबाट काठमाडौंतर्फ आउँदै गरेको यात्रुबाहक बस, सोही दिशाबाट आउँदै गरेको ट्रकमा ठक्कर खाएर दुर्घटना भएको हो ।
उक्त दुर्घटनामा परी घाइते भएकाहरूलाई उपचारको लागि भरतपुर पठाइएको प्रहरीले जानकारी दिएको छ ।
प्रहरीका अनुसार दुवै बस र ट्रक घटनास्थलमा रहेकोले दुइतर्फी बाटो अवरुद्ध भएकोछ । बाटो खुलाउने प्रयास भइरहेको पनि जनाइएको छ ।
उक्त स्थानमा सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटार र नेपाल प्रहरीको संयुक्त टोली खटिएको छ ।
