चितवन । राप्ती नगरपालिकाले आर्थिक वर्ष २०७९/०८० देखि रोकिएका उपभोक्ता समितिका भुक्तानी प्रक्रिया टुंग्याउन थालेपछि स्थानीयमा राहत र उत्साह छाएको छ। विविध प्रशासनिक तथा प्रक्रियागत कारणले तीन आर्थिक वर्षदेखि रोकिएका विकास योजनाका भुक्तानीहरू अहिले क्रमशः सम्पन्न भइरहेका छन्। साथै, आर्थिक वर्ष २०८१/०८२ का चालु योजनाको भुक्तानीसमेत सुरु भइसकेको नगरपालिकाले जनाएको छ।
नगरपालिकाका अनुसार करिब ९० प्रतिशत योजनाको भुक्तानी सम्पन्न भइसकेको छ भने बाँकी केही योजनामा आवश्यक कागजात अपुग, बैंक खातासम्बन्धी समस्या तथा अन्य प्राविधिक कारणले मात्र भुक्तानी रोकिएको हो। ती समस्या समाधान भएपछि बाँकी रकम पनि उपलब्ध गराइने जनाइएको छ।
राप्ती नगरपालिकाका प्रमुख शमशेर लामाले नियमित प्रमुख प्रशासकीय अधिकृतको अभावका कारण लामो समयदेखि भुक्तानी प्रक्रिया प्रभावित भएको बताए। उनका अनुसार अहिले प्रशासनिक समस्या समाधान भएसँगै रोकिएका भुक्तानीलाई प्राथमिकताका साथ टुंग्याइएको हो।
उनले भने, “तीन वर्षदेखि रोकिएका योजनाको भुक्तानी अहिले सम्पन्न हुँदै गएको छ। ९० भन्दा बढी उपभोक्ता समितिले आफ्नो रकम प्राप्त गरिसकेका छन्। अब आगामी आर्थिक वर्षदेखि यस्तो समस्या दोहोरिन नदिने प्रतिबद्धता लिएका छौं। कुनै समस्या आए पनि त्यसलाई समयमै समाधान गरेर मात्र अगाडि बढ्नेछौं।”
नगर उपप्रमुख देवेन्द्र लामाले ढिलाइले जनताले दुःख पाएको स्वीकार गर्दै त्यो अवस्था प्रक्रियागत र प्रशासनिक कारणले सिर्जना भएको बताए। उनका अनुसार जनप्रतिनिधिको नियतभन्दा पनि परिस्थितिका कारण भुक्तानी रोकिएको थियो।
उनले भने, “ढिलो भए पनि अहिले भुक्तानी भएपछि उपभोक्ताले राहत महसुस गरेका छन्। जनतालाई परेको समस्या समाधान गर्नु नै हाम्रो प्राथमिकता हो।”
प्रमुख प्रशासकीय अधिकृत प्रदीप पौडेलले पुराना विवाद समाधान गर्दै जनप्रतिनिधि र प्रशासनबीच समन्वय बढेकाले भुक्तानी प्रक्रिया सहज बनेको बताए।
उनका अनुसार, “जेठ महिनामा बसेको कार्यपालिका बैठकले पुराना भुक्तानी सम्बन्धी विषय टुंगो लगाएपछि भुक्तानी सुरु गरिएको हो। यसले जनप्रतिनिधि र प्रशासनबीचको सम्बन्ध मात्रै सुधारिएको छैन, विकास निर्माणमा लगानी गरेका नागरिकले पनि आफ्नो रकम प्राप्त गर्न सकेका छन्।”
स्थानीय उपभोक्ता समितिका प्रतिनिधिहरूले विगतमा प्रशासन र जनप्रतिनिधिबीच आवश्यक समन्वय हुन नसक्दा समस्या लम्बिएको धारणा राखेका छन्। उनीहरूका अनुसार हालका प्रमुख प्रशासकीय अधिकृत प्रदीप पौडेलले विषयलाई व्यवहारिक ढंगले लिएर स्पष्ट निर्णय गर्ने वातावरण बनाएका कारण लामो समयदेखि रोकिएको समस्या समाधान भएको हो।
स्थानीयहरू भन्छन्, “दिन मिल्ने भुक्तानी तत्काल दिने र नदिने भए स्पष्ट निर्णय गर्ने अडानका कारण कार्यपालिकामा छलफल भयो र रोकिएका भुक्तानी टुंगिए।”
राप्ती नगरपालिकाले यस आर्थिक वर्षमा सम्झौता भएका अधिकांश योजनाको भुक्तानी सम्पन्न गरिसकेको जनाएको छ। बाँकी रहेका केही योजनामा आवश्यक प्रक्रिया पूरा हुनासाथ भुक्तानी गरिने नगरपालिकाको भनाइ छ।
तीन वर्षदेखि रोकिएको भुक्तानी सम्पन्न हुन थालेपछि उपभोक्ता समिति, निर्माण व्यवसायी तथा स्थानीय नागरिकमा नयाँ विश्वास जागेको छ। विकास निर्माणमा लगानी गरेका नागरिकले आफ्नो रकम प्राप्त गर्न थालेसँगै राप्ती नगरपालिका सेवा प्रवाहलाई थप प्रभावकारी र उत्तरदायी बनाउने दिशामा अघि बढेको सन्देश दिएको छ।
