कर प्रणाली र सार्वजनिक सेवामा आमूल सुधार शुरू : अर्थमन्त्री वाग्ले
काठमाण्डाै – अर्थमन्त्री डा. स्वर्णिम वाग्लेले देशको अर्थतन्त्रलाई औपचारिकीकरण गर्न र युवा उद्यमीहरूलाई प्रोत्साहन गर्न सरकारले कर प्रणाली तथा सार्वजनिक सेवा प्रवाहमा आमूल परिवर्तन शुरू गरेको बताउनुभएको छ ।
काठमाण्डाैमा आज आयोजित ‘युवा उद्यमशीलता सम्मेलन–२०८३’ लाई सम्बोधन गर्दै अर्थमन्त्री वाग्लेले दशकौँदेखि चर्चामा सीमित कर सुधारका एजेन्डालाई वर्तमान सरकारले कार्यान्वयनमा लगेको दाबी गर्नुभयो ।
करको बोझ र कानूनी झन्झटका कारण व्यवसाय बन्द गरेर बसेका वा लुकेर बस्न बाध्य भएका साना उद्यमीहरूका लागि सरकारले विशेष आममाफीको योजना ल्याएको वाग्लेले जानकारी दिनुभयो । उहाँका अनुसार विगतका बक्यौताका कारण ठूलो दायित्व बोकेका झन्डै २ देखि ३ लाख साना कम्पनी तथा व्यक्तिहरूले अब १ प्रतिशत प्रशोधन शुल्क तिरेर आफ्नो व्यवसाय पुनः वैधानिक रूपमा सञ्चालन गर्न सक्नेछन् ।
सार्वजनिक सेवा प्रवाहलाई झन्झटमुक्त बनाउन मालपोत, राहदानी र लाइसेन्सजस्ता कार्यालयहरूमा आमूल सुधार भइरहेको उहाँको भनाइ छ ।
नागरिक एपमार्फत थप १०० वटा सेवा उपलब्ध गराउने तयारी भइरहेको जानकारी दिँदै उहाँले डिजिटल माध्यमबाट सेवा प्रवाह गरी बिचौलियाहरूको भूमिका अन्त्य गर्ने स्पष्ट पार्नुभयो ।
१०–१५ वर्षदेखि सीमित स्वार्थ समूहको कब्जामा रहेको राज्यका संयन्त्रहरूलाई मुक्त गर्ने अभियान शुरू भएको भन्दै अर्थमन्त्री वाग्लेले ठूला भ्रष्टाचार र वित्तीय घोटालाहरूमाथि कारबाही अघि बढाइएको उल्लेख गर्नुभयाे । युवाहरूमा रहेको ‘यो देशमा केही हुँदैन’ भन्ने नकारात्मक भाष्यलाई चिर्न सरकारले जग बसाल्ने काम गरिरहेको उहाँको जिकिर छ ।
