सम्पत्ति विवरण बुझाउने म्याद असार मसान्तसम्म थप
काठमाण्डाै – सम्पत्ति छानबिन आयोगले सम्पत्ति विवरण बुझाउने म्याद एक महिना थपेर असार मसान्तसम्म कायम गरेको छ । आयोगका अध्यक्ष राजेन्द्रकुमार भण्डारीका अनुसार स्वदेश तथा विदेशमा रहेका पदाधिकारीले विवरण सङ्कलनमा समय अपुग भएको भन्दै बारम्बार आग्रह गरेपछि यो निर्णय लिइएको हो ।
नवयुवा आन्दोलनका क्रममा कतिपय कार्यालय आगजनीमा परेर विवरण सङ्कलनमा कठिनाइ भएको पनि उहाँले बताउनुभयो । अध्यक्ष भण्डारीले यो अन्तिम पटकका लागि मात्र म्याद थपिएको र अब पुनः म्याद नथपिने स्पष्ट पार्दै सम्बन्धित सबैले अनिवार्य रूपमा विवरण दाखिल गर्नुपर्ने बताउनुभयो ।
अहिलेसम्म ३ हजार ५०० जनाभन्दा धेरैले सम्पत्ति विवरण बुझाइसकेका छन् भने ६० वटा उजुरी पनि प्राप्त भएका छन् ।
आयोगले २०४८ सालपछि सार्वजनिक पदमा रहेका, सेवानिवृत्त भएका वा हटिसकेका राजपत्राङ्कित विशिष्ट एवम् प्रथम श्रेणीका सबै कर्मचारीले विवरण बुझाउनुपर्ने जनाएको छ । आयोगले पछिल्ला ३५ वर्षको अवधिलाई दुई चरणमा विभाजन गरी छानबिन अगाडि बढाउने तयारी गरेको छ ।
अध्यक्ष भण्डारीले ४० देखि ५० हजार जनाको सम्पत्ति विवरण प्राप्त हुने अपेक्षा राख्दै निर्धक्क भएर विवरण पेश गर्न सबैसँग आग्रह गर्नुभएको छ ।
