प्रधानमन्त्रीको अभिव्यक्तिमाथि रणनीति बनाउन कांग्रेसद्वारा विपक्षी दलहरूको बैठक आह्वान
प्रधानमन्त्रीको अभिव्यक्तिमाथि रणनीति बनाउन कांग्रेसद्वारा विपक्षी दलहरूको बैठक आह्वान
काठमाडौं । प्रमुख प्रतिपक्षी दल नेपाली कांग्रेसले संसद्मा प्रतिनिधित्व गर्ने विपक्षी दलहरूको आकस्मिक बैठक बोलाएको छ। प्रमुख प्रतिपक्षी दल कांग्रेस संसदीय दलका नेता भीष्मराज आङ्देम्बेको आह्वानमा सिंहदरबारस्थित कांग्रेस संसदीय दलको कार्यालयमा मध्याह्न १२ बजे बैठक डाकिएको हो।
बैठकमा मुख्यत: प्रधानमन्त्री वालेन्द्र शाहले हिजो दिएको अभिव्यक्ति र त्यसपछि उत्पन्न राजनीतिक परिस्थितिबारे छलफल हुने बताइएको छ। प्रधानमन्त्री शाहले ‘नेपालले भारतको थुप्रै ठाउँमा सीमा मिचेको’ भनी दिएको विवादित बयानलाई लिएर विपक्षी दलहरूले साझा रणनीति तय गर्न लागेका हुन्।
बैठकमा प्रमुख प्रतिपक्षी नेपाली कांग्रेससहित नेकपा (एमाले), नेपाली कम्युनिस्ट पार्टी, श्रम संस्कृति पार्टी र राष्ट्रिय प्रजातन्त्र पार्टी (राप्रपा) का शीर्ष नेताहरूलाई आमन्त्रण गरिएको छ।
दिउँसो १ बजे बस्ने प्रतिनिधिसभा बैठकमा सरकारविरुद्ध कसरी प्रस्तुत हुने र प्रधानमन्त्रीको अभिव्यक्तिको विरोध कुन रूपमा गर्ने भन्नेबारे विपक्षी गठबन्धनले सामूहिक निर्णय लिने तयारी गरेको छ।
प्रधानमन्त्रीको विवादित अभिव्यक्तिका कारण आजको प्रतिनिधिसभा बैठकमा विपक्षी दलहरूले आक्रामक रूपमा कुरा उठाउने र संसद् अवरोधसम्म हुन सक्ने आकलन गरिएको छ। परराष्ट्र नीति र राष्ट्रिय सार्वभौमिकतासँग जोडिएको विषय भएकाले विपक्षीहरूले यसलाई संसद्मा मुख्य मुद्दा बनाउने निश्चित देखिएको छ।
