काठमाडौं । इन्डियन प्रिमियर लिग (आईपीएल २०२६) को फाइनलमा आज साविक विजेता रोयल च्यालेन्जर्स बेङ्गलुरु र गुजरात टाइटन्सबीच अहमदाबादस्थित नरेन्द्र मोदी स्टेडियममा उपाधिका लागि कडा प्रतिस्पर्धा हुँदैछ । नेपाली समय अनुसार बेलुकी पौने आठ बजे सुरु हुने फाइनलमा दुवै टोली दोस्रो पटक आईपीएलको ट्रफी उचाल्ने दाउमा मैदान उत्रनेछन्।
रजत पाटीदारको कप्तानीमा रहेको बेङ्गलुरुले गत संस्करणामा आफ्नो पहिलो ऐतिहासिक उपाधि जितेको थियो भने शुभमन गिलको नेतृत्वमा रहेको गुजरात सन् २०२२ को आफ्नो डेब्यु सिजनमै च्याम्पियन बनेको थियो ।
विगतका आठ सिजनमा क्वालिफायर–१ जित्ने टोलीले नै फाइनलको ट्रफी उचालेकाले यस पटक बेङ्गलुरुको मनोबल उच्च छ, जसले क्वालिफायर–१ मा गुजरातलाई ९२ रनको विशाल अन्तरले पराजित गरेको थियो । दुई टोलीबीच अहिलेसम्म भएका ९ भेटमा बेङ्गलुरु ५ खेल जित्दै अग्रतामा छ भने गुजरातले ४ खेलमा जित हात पारेको छ ।
फाइनल खेलमा दुवैतर्फका मुख्य खेलाडीहरूको प्रदर्शन निर्णायक बन्ने सम्भावना छ । गुजरातका लागि यस सिजन १५ खेलमा ७२२ रन बनाइसकेका कप्तान शुभमन गिल र ७१० रन जोडेका साई सुदर्शन उत्कृष्ट फर्ममा छन् भने बलिङतर्फ २८ विकेटका साथ पर्पल क्यापको दौडमा शीर्ष स्थानमा रहेका कागिसो रबाडा मुख्य हतियार हुन् । अर्कोतर्फ, बेङ्गलुरुका लागि यो सिजन ६०० रन पूरा गरिसकेका रन-मसिन विराट कोहली, क्वालिफायर–१ मा ९३ रनको आक्रामक इनिङ खेलेका रजत पाटीदार र २६ विकेट लिइसकेका अनुभवी बलर भुवनेश्वर कुमार मुख्य आकर्षणका रूपमा रहेका छन् ।
गुजरातका लागि तीव्र गतिका बलर मोहम्मद सिराजको चोट फाइनलअघि मुख्य चिन्ताको विषय बनेको छ । अहमदाबादको नरेन्द्र मोदी स्टेडियममा यस सिजन केवल तीन पटक मात्रै २०० भन्दा बढीको स्कोर बनेकाले आजको पिचमा बलर र ब्याटरबीच कडा टक्कर हुने अनुमान गरिएको छ । आईपीएल फाइनलको १८ वर्षे इतिहासमा अहिलेसम्म २०० भन्दा बढीको स्कोर भने चेज हुन सकेको छैन ।
