काठमाडौँ । सङ्घीय संसद्अन्तर्गत आज दुवै सदन (प्रतिनिधि सभा र राष्ट्रिय सभा) को बैठक बस्दै छ। संसद् सचिवालयले दुवै सदनका लागि छुट्टाछुट्टै समय र विभिन्न कार्यसूचीहरू निर्धारण गरेको छ।
बिहान सवा ११ बजे बस्ने राष्ट्रिय सभाको बैठकमा मुख्यतया प्रतिनिधि सभाबाट सन्देशसहित प्राप्त विभिन्न विधेयकहरूमाथि छलफल र पारित गर्ने कार्यसूची रहेको छ। बैठकमा प्रधानमन्त्री एवं गृहमन्त्री बालेन्द्र साहले प्रतिनिधि सभाबाट सन्देशसहित प्राप्त ‘प्रतिनिधि सभा सदस्य निर्वाचन (पहिलो संशोधन) विधेयक, २०८३’ माथिको दफावार छलफल सदनमा गरियोस् भन्ने प्रस्ताव प्रस्तुत गर्नेछन्।
त्यसपछि सोही विधेयकलाई पारित गरियोस् भन्ने प्रस्ताव पनि उनले नै प्रस्तुत गर्ने कार्यसूची छ। यसका साथै प्रतिनिधि सभाबाटै सन्देशसहित प्राप्त भएको ‘मतदाता नामावली (पहिलो संशोधन) विधेयक, २०८३’ माथिको दफावार छलफल सदनमा गरियोस् भन्ने प्रस्ताव र उक्त विधेयकलाई पारित गरियोस् भन्ने प्रस्ताव समेत प्रधानमन्त्री साहले बैठकमा प्रस्तुत गर्नेछन्।
त्यस्तै दिउँसो १ बजे प्रतिनिधि सभाको बैठक बस्नेछ, जसमा नियमावली मस्यौदा समितिको प्रतिवेदनमाथि दफावार छलफल र पारित गर्ने मुख्य कार्यक्रम रहेको छ। बैठकमा प्रतिनिधि सभा नियमावली मस्यौदा समितिका सभापति गणेश पराजुलीले ‘प्रतिनिधि सभा नियमावली मस्यौदा समितिको प्रतिवेदन, २०८३’ माथि दफावार छलफल प्रारम्भ गरियोस् भन्ने प्रस्ताव प्रस्तुत गर्नेछन्। उक्त प्रतिवेदनमाथि प्राप्त भएका विभिन्न संशोधनहरूलाई निर्णयार्थ प्रस्तुत गरिसकेपछि सभापति पराजुलीले प्रतिवेदन पारित गरियोस् भन्ने प्रस्ताव सदनमा प्रस्तुत गर्नेछन्।
नियमावली पारित भइसकेपछि अर्थमन्त्री डा। स्वर्णिम वाग्लेले ‘नेपाल राष्ट्र बैङ्क (तेस्रो संशोधन) विधेयक, २०८३’ प्रस्तुत गर्न अनुमति माग्ने प्रस्ताव प्रस्तुत गर्नेछन् र अनुमति प्राप्त भएपछि उनले उक्त विधेयक सदनमा प्रस्तुत गर्ने कार्यसूची छ। बैठकको अन्त्यतिर युवा, श्रम तथा रोजगार मन्त्री रामजी यादवले ‘अन्तर्राष्ट्रिय श्रम सङ्गठनको श्रम निरीक्षण सम्बन्धी महासन्धी, १९४७ (नं ८१)’ र ‘अन्तर्राष्ट्रिय श्रम सङ्गठनको बाध्यकारी श्रम महासन्धी, १९३०’ सम्बन्धी सन् २०१४ को प्रोटोकल नं २९ सदनसमक्ष पेस गर्नेछन्।
