काठमाडौं । अमेरिकी सरकारले ‘पर्सियन गल्फ स्ट्रेट अथोरिटी’माथि नयाँ प्रतिबन्ध घोषणा गरेको छ । अमेरिकी अर्थ मन्त्रालयले बुधबार जारी गरेको विज्ञप्तिमा उक्त संस्था ‘स्ट्रेट अफ होर्मुज’बाट जहाजहरूको आवतजावत नियन्त्रण गर्ने इरानी योजनाको नेतृत्व गरिरहेको जनाइएको छ । साथै, अन्तर्राष्ट्रिय कानुन र अमेरिकी प्रतिबन्धहरूको उल्लंघनमा संलग्न रहेको आरोप लगाइएको छ ।
‘पर्सियन गल्फ स्ट्रेट अथोरिटी’ होर्मुज जलमार्गमा जहाजहरूको आवतजावत नियमन गर्नका लागि इरानले हालै गठन गरेको संस्था हो । इरान–अमेरिका तनाव चर्किएपछि इरानी सेनाले जलमार्गमाथि आफ्नो नियन्त्रण कडा बनाएको थियो ।
अमेरिकी अर्थ मन्त्रालयले उक्त संस्थासँग सहकार्य गर्ने व्यक्ति वा कम्पनीहरू पनि प्रतिबन्धको दायरामा पर्न सक्ने चेतावनी दिएको छ । मन्त्रालयका अनुसार, यस्ता गतिविधिहरूले ईस्लाकिन रेभुलुसनरी गार्ड्सलाई सहयोग पुग्ने तथा उसले सञ्चालन गरेको अवैध असुली प्रणालीलाई फाइदा पुग्ने दाबी गरिएको छ ।
विगत केही महिनादेखि होर्मुज जलमार्गमा तनाव बढ्दै गएको छ । धम्की, निरीक्षण तथा सम्भावित आक्रमणको जोखिमका कारण अन्तर्राष्ट्रिय ढुवानी गतिविधि प्रभावित भएको र विश्व बजारमा इन्धनको मूल्य समेत बढेको बताइएको छ ।
इरानले भने आफूले होर्मुजको मार्ग बन्द नगरेको दाबी गर्दै आएको छ । तर, विभिन्न अन्तर्राष्ट्रिय रिपोर्टहरूका अनुसार, जहाजहरूले इरानी अधिकारीहरूसँग समन्वय गरेपछि मात्र इरानी तटनजिकको विशेष कोरिडोरमार्फत जलमार्ग पार गर्न अनुमति पाउने गरेका छन् ।
पश्चिमी देशहरू, खाडी मुलुकहरू तथा अन्तर्राष्ट्रिय शिपिङ कम्पनीहरूले इरानले जहाजहरूबाट ‘टोल’ असुल गरेको आरोप लगाउँदै त्यसको विरोध गरिरहेका छन् ।
