पूर्वी चितवनको खैरहनीमा रहेको डेजी स्कुल तथा सुनगाभा कलेजका तीन जना प्रतिभाशाली विद्यार्थीले विश्वकै सबैभन्दा ठूलो एआई तथा रोबोटिक्स प्रतियोगिता ‘कोड एभर’ मा नेपालको प्रतिनिधित्व गर्दै सान्त्वना स्थान हासिल गरेका छन्।
आइतबार इन्डोनेसियाको जाकार्तामा सम्पन्न उक्त प्रतियोगितामा डेजी स्कुलका गुञ्जन शर्मा, परिभाषा पाठक र सृष्टि शंकरको टोलीले उक्त उपलब्धि हासिल गरेको सुनगाभा कलेजका प्राचार्य हरि प्रसाद सापकोटाले पुष्टि गर्नुभयो ।
गुञ्जन शर्मा कक्षा १२ मा र परिभाषा पाठक तथा सृष्टि शंकर कक्षा ११ मा अध्ययनरत छन्। प्रतियोगितामा सहभागी हुनुअघि विद्यालयले उनीहरूलाई जनही ५० हजार रुपैयाँ नगदसहित प्रोत्साहन गर्दै बिदाइ गरेको थियो।
डेजी स्कुल र सुनगाभा कलेज पूर्वी चितवनमा उत्कृष्ट शैक्षिक नतिजाका लागि परिचित छन्। यी संस्थाहरूले गुणस्तरीय शिक्षा, प्राविधिक सीप विकास र अतिरिक्त क्रियाकलापमार्फत विद्यार्थीहरूलाई विश्वस्तरमा प्रतिस्पर्धा गर्न सक्षम बनाउँदै आएका छन्।
