भारतीय प्रधानमन्त्री माेदीकाे अपील : ‘घरबाटै काम गर्नु, एक वर्षसम्म सुन नकिन्नु’
भारतीय प्रधानमन्त्री नरेन्द्र मोदीले मध्यपूर्वमा चलिरहेको युद्धका कारण विश्वव्यापी ऊर्जा मूल्यमा भएको वृद्धिलाई सम्बोधन गर्न नागरिकलाई घरबाटै काम गर्ने बानी बसाल्न, एक वर्षसम्म सुन नकिन्न र विदेश यात्रा सीमित गर्न अपील गर्नुभएको छ ।
प्रधानमन्त्री मोदीले कोभिड–१९ महामारीको सम्झना दिलाउने मितव्ययिताका उपायहरूले भारतको इन्धन प्रयोग घटाउने र विदेशी मुद्रा बचत गर्न मद्दत गर्ने बताउनुभएको बीबीसीले जनाएको छ ।
भारतले ९० प्रतिशत तेल आयात गर्छ र इरानमाथि अमेरिका–इजरायलको युद्धपछि तेल आयातमा अर्बाैँ डलरको वृद्धि भएको छ । मध्यपूर्व युद्धका कारण ‘स्ट्रेट अफ हर्मुज’ दुई महिनाभन्दा धेरै समयदेखि अवरुद्ध छ ।
हिजो दक्षिणी शहर हैदराबादमा एक सार्वजनिक कार्यक्रममा मोदीले गर्नुभएको अपीललाई विश्लेषकहरूले अहिलेसम्मकै ‘सबैभन्दा कठोर’ भनेर वर्णन गरेका खबरमा उल्लेख छ ।
मोदीले देशभक्ति भनेको सीमामा आफ्नो जीवन बलिदान दिन तयार हुनु मात्र नभई अहिलेको समयमा जिम्मेवारीपूर्वक बाँच्ने र आफ्नो दैनिक जीवनमा राष्ट्रप्रतिको कर्तव्य पूरा गर्नेबारे रहेको बताउनुभएको थियो । वर्तमान अवस्थामा विदेशी मुद्रा बचतमा ठूलो जोड दिनुपर्ने उहाँको भनाइ थियो ।
मेट्रो जस्ता सार्वजनिक गाडीको प्रयोग गर्न आग्रह गर्दै मोदीले इन्धन बचत गर्न मानिसहरूलाई ‘कार पुलिङ’ प्रणाली अपनाउन सुझाव दिनुभएको छ । उहाँले किसानहरूलाई मलको प्रयोग आधा घटाउन पनि आग्रह गर्नुभएको छ ।
सरकारी इन्धन खुद्रा बिक्रेताहरूमाथि बढ्दो दबावका बाबजुद भारतले अहिलेसम्म पेट्रोल र डिजेलको मूल्य बढाएको छैन । तर लामो समयदेखिको द्वन्द्व र तेल आपूर्तिमा अवरोधले अर्थतन्त्रमा तनाव सिर्जना गर्न थालेको छ ।
यसैबीच भारतीय प्रधानमन्त्री मोदीले विदेशी मुद्रा बचत गर्नका लागि सुन नकिन्न आग्रह गरेपछि आज गहना कम्पनीहरूको शेयरमा तीव्र गिरावट आएको छ । प्रमुख गहना कम्पनीहरूको शेयर मूल्यमा १० प्रतिशतभन्दा धेरैको गिरावट आएको छ ।
यस्तै भारतीय शेयर बजार ‘बीएसई सेन्सेक्स’ आज शुरुआती कारोबारमा १ हजार अङ्कभन्दा धेरैले घटेको छ । विश्लेषकहरूले लामो समयसम्म आर्थिक अवरोधको डरका बीचमा शेयर बजार उच्च अङ्कले घट्नुको एउटा कारण मोदीको टिप्पणी रहेको बताएका छन् ।
