काठमाडौँ । सार्वजनिक खरिद अनुगमन कार्यालयको ‘बोलपत्र डटकम डट एनपी’ नामक वेबसाइटमा अनधिकृत पहुँच बनाएर ठेक्काको विवरण हेरफेर गरेको आरोपमा ‘क’ वर्गका निर्माण कम्पनीका सञ्चालकहरू सहित १२ जना थुनामा छन् । पूर्वमन्त्री तथा कालिका कन्स्ट्रक्सन कम्पनीका सञ्चालक विक्रम पाण्डेसहित निर्माण व्यवसायीमाथि प्रहरीको केन्द्रीय अनुसन्धान ब्युरो (सीआईबी) र साइबर ब्युरोका अधिकृतहरूले अनुसन्धान गरिरहेका छन् ।
पूर्वमन्त्री पाण्डेसँगै अर्का निर्माण व्यवसागी प्रकाश ढुंगाना पनि हिरासतमा छन् । वैशाख १३ मा पक्राउ परेका ढुंगाना कल्पवृक्ष बिल्डर्स प्रालिका सञ्चालक हुन् । वेबसाइट ह्याक गरेर आफ्नो कम्पनीलाई ठेक्का पारिदिएबापत ढुंगानाको कम्पनीले एक जना व्यक्तिलाई ४० लाख रुपैयाँ ‘घुस’ दिएको प्रहरीको अनुसन्धानबाट थाहा भएको छ ।
काठमाडौँ उपत्यकाको फोहोर व्यवस्थापन हुने बञ्चरेडाँडा क्षेत्रको ठेक्कामा विवरण हेरफेर गरेर ढुंगानाको कम्पनीले ठेक्का पारेको भेटिएको छ । बञ्चरेडाँडा सेनेटरी ल्याण्डफिल साइटको प्रबलित माटोको फोहोर रोक्ने बाँधको उचाइ बिस्तार गर्ने ठेक्का कल्पवृक्षले गैह्रकानुनी तरिकाले लिएको प्रहरीको अनुसन्धान निष्कर्ष छ । विवरण हेरेफेर गरेर ठेक्का आफ्नो कम्पनीलाई पारिदिए बापत ढुंगानाले दोस्रो व्यक्तिलाई ४० लाख रकम दिएको अनुसन्धानमा संलग्न एक अधिकृतले रातोपाटीलाई बताए । अनुसन्धानमा संलग्न एक जना अधिकृतले भने, ‘ढुंगानाले ४० लाख भुक्तानी दिएको अनुसन्धानको क्रममा खुलेको छ, रकम लिने व्यक्तिमाथि अनुसन्धान गरिरहेका छौँ ।’
रकम लिने व्यक्ति सरकारी कर्मचारी हुन् या ह्याकर हुन भन्नेबारे अनुसन्धान अधिकृतहरूले खुलाएका छैनन् ।
राष्ट्रिय प्रजातन्त्र पार्टी (राप्रपा)का उपाध्यक्ष एवं पूर्वमन्त्री विक्रम पाण्डेको कम्पनी कालिका कन्स्ट्रक्सनले महेन्द्र राजमार्गको पथलैया खण्डको बागमती पुलको ठेक्काको विवरण हेरफेर गरेको भेटिएको छ । बाराको पथलैया स्थित बागमती पुलको ठेक्कामा कालिका कन्स्ट्रक्सनको विडर आइडी प्रयोग भएर प्राविधिक प्रस्ताव पारित भएपछि आर्थिक प्रस्ताव खोल्नुअघि ठेक्काको छुट प्रतिशत हेरेफेर गरेको अनुसन्धानमा संलग्न एकजना अधिकृतले रातोपाटीलाई बताए ।
२०७९ मा सहरी विकास मन्त्री भएका पाण्डे वैशाख ११ मा पक्राउ परेका थिए । बोलपत्र प्रणाली ह्याक गरेर सवै प्रतिस्पर्धीको कागजात हेरेपछि छुट प्रतिशत हेरेफेर गरिएको प्रहरीको अनुसन्धान निष्कर्ष छ । नेपाल निर्माण व्यवसायी महासंघका अध्यक्ष निकोलस पाण्डे विक्रमका छोरा हुन् । हालै अध्यक्षमा निर्वाचित निकोलस कालिका कन्स्ट्रक्सनको कार्यकारी निर्देशक हुन् ।
आशिष निर्माण सेवाले केयुकेएलको ठेक्कामा ‘मिलेमतो’ गरेको आशंका छ । काठमाडौं उपत्यका खानेपानी लिमिटेड (केयूकेएल)को पाइप बिछ्याउने ३ वटा प्याकेजमा विवरण हेरफेर गरेको आशंकामा प्रहरीले अनुसन्धान गरिरहेको छ । आशिष निर्माण सेवाका सञ्चालक ऋषिकेश गौलीलाई प्रहरीले थुनामा राखेर अनुसन्धान गरिरहेको छ ।
वेबसाइट ह्याक गरेर ठेक्का कब्जा गर्न सरकारी कर्मचारीकै संलग्नता देखिएको छ । सहरी विकास तथा भवन निर्माण कार्यालय धनकुटाका नायब सुब्बा दिवाकर देउजा ठेक्काको बिरण हेरफेरमा संलग्न रहेको सीआईबीको अनुसन्धान निष्कर्ष छ । धनकुटाको पाख्रिबास गाउँपालिका–५ घर भएका ३३ वर्षीय देउजालाई सीआईबीले एक महिनाअघि नै पक्राउ गरेको थियो । उनले ठेकेदार र ह्याकरबिच समन्वय गराएर ठेक्का कब्जा गर्ने र कमिसन लिने गरेको अनुसन्धानबाट थाहा भएको सीआईबीका एक उच्च अधिकृतले बताए । ती अधिकृले भने, ‘ठेक्काको विवरण हेरेफेर गर्नमा देउजको भूमिका देखिन्छ ।’
देउजा यसअघि २०७७ मा टेलिकमको सर्भर ह्याक गरेर टपअप प्रणालीमार्फत रकम हिनामिना गरेको घटनामा पक्राउ परेका थिए । त्यस्तै अपराधमा उनी अहिले दोस्रो पटक पक्राउ परेका हुन् ।
बोलपत्र प्रणाली ह्याक गरेर ठेक्काहरूका विवरण हेरफेर गरेको कसुरमा सीआईबी र साइबर ब्युरोको टिमले अनुसन्धान गरिरहेको छ । आरोपीहरूमाथि संगठित अपराध र विद्युतीय कारोबार ऐन २०६३ अन्तर्गतको कसुरमा अनुसन्धान भइरहेकको सीआईबीका एआईजी डा मनोज केसीले रातोपाटीलाई बताए । उनले भने, ‘ह्याक गरेर ठेक्काको विवरण फेरबदल गरिएको वा कर्मचारीको मिलेमतोमा भएको हो भन्नेबारे हेर्दै छौँ ।’
१२ जना पक्राउ
सार्वजनिक खरिद अनुगमन कार्यालय (पीपीएमओ)को बोलपत्र प्रणालीमा अनधिकृत पहुँच राखेर ठेक्काहरूका विवरण हेरेफेर गरेको आरोपमा अहिलेसम्म १२ जना पक्राउ परेका छन् । धनकुटाको पाख्रीबास नगरपालिका–५ घर भएका दिवाकर देउजा, बझाङका धरत धामी, तनहुँका सञ्जय भट्ट, काठमाडौँ–३३ घर भएका भाष्कर राज अर्याल, हेटौंडा घर भएका सागर कटुवाल र सुनसरीका जीवन कुमार दास पहिलो चरणमा पक्राउ परेका थिए ।
त्यसपछि पूर्वमन्त्री विक्रम पाण्डे र भिषण कन्स्ट्रक्सनका सञ्चालक टंक कुमार श्रेष्ठ पक्राउ परे । सीआईबीले चपुर निर्माण सेवाका सञ्चालक अमृत बोहरा, इन्कोन प्रालिका सेयरधनी स्वेदश पोखरेल र कल्पवृक्ष बिल्डर्स प्रालिका सञ्चालक प्रकाश ढुंगानालाई पक्राउ गरेर अनुसन्धान गरिरहेको छ । आशिष निर्माण सेवाका सञ्चालक ऋषिकेश गौली पनि प्रहरीको हिरासतमा छन् ।
