वैशाख १८ गते, चितवन —
चितवनको राप्ती नगरपालिका वडा नं. १ स्थित सत्यश्वर महादेव शिवालय मन्दिर परिसरमा आयोजित निःशुल्क स्वास्थ्य शिविर तथा रक्तदान कार्यक्रम सफलतापूर्वक सम्पन्न भएको छ। मन्दिर व्यवस्थापन समिति, सेन्ट जेभियर एकेडेमिक कन्सल्टेन्सी चितवनको संयुक्त आयोजना तथा वैकल्पिक आयुर्वेद चिकित्सालय रत्ननगरको सहयोगमा कार्यक्रम सञ्चालन गरिएको थियो।
कार्यक्रम अन्तर्गत कुल ६१ जनाले रक्तदान गरेका छन्। जसमा महिला १५ जना र पुरुष ४६ जना रहेका छन्। रक्तदातामध्ये २४ जना नयाँ तथा ३७ जना पुराना (अनुभवी) रक्तदाता रहेको आयोजकले जनाएको छ। “रक्तदान महादान” भन्ने मूल नारालाई आत्मसात गर्दै स्थानीय बासिन्दाको उल्लेखनीय सहभागिता देखिएको थियो।
त्यसैगरी, स्वास्थ्य शिविरतर्फ २५० जनाको स्वास्थ्य परीक्षण गरिएको थियो। शिविरमा आएका बिरामीहरूलाई आवश्यक अनुसार निःशुल्क औषधि वितरण समेत गरिएको थियो। ग्यास्ट्रिक, जोर्नी दुखाइ, नसा सम्बन्धी समस्या, महिला स्वास्थ्य, प्रेसर तथा सुगर परीक्षण लगायत विभिन्न स्वास्थ्य सेवाहरू प्रदान गरिएको थियो।
कार्यक्रमले स्थानीय स्तरमा स्वास्थ्य सचेतना अभिवृद्धि गर्नुका साथै आपतकालीन अवस्थाका लागि रगत संकलनमा महत्वपूर्ण योगदान पुर्याएको आयोजकले जनाएको छ। सहभागीहरूले यस्ता कार्यक्रमले समुदायमा सकारात्मक प्रभाव पार्ने बताएका छन्।
