वैशाख १८ गते, चितवन — गुणस्तर तथा खाद्य विभाग, चितवनको आयोजनामा तथा राप्ती उद्योग वाणिज्य संघको समन्वयमा खाद्य स्वच्छता तथा गुणस्तर सम्बन्धी सरोकारवालाहरूसँग अन्तरक्रिया कार्यक्रम सम्पन्न भएको छ।
कार्यक्रम गुणस्तर तथा खाद्य विभाग, चितवनका कार्यालय प्रमुख प्रमोद चन्द्र पौडेलको अध्यक्षतामा सम्पन्न भएको थियो। कार्यक्रममा राप्ती उद्योग वाणिज्य संघका अध्यक्ष श्री राजकुमार कंडेल प्रमुख अतिथिको रूपमा उपस्थित रहनु भएको थियो। विशिष्ट अतिथिहरूमा वरिष्ठ उपाध्यक्ष ओम प्रसाद डल्लाकोटी, प्रतिभा पाण्डे तथा राजकुमार सेढाई रहनु भएको थियो।
त्यसैगरी कार्यक्रममा सन्तराज शर्मा, गीता पाइजा, रामहरी उप्रेती तथा टंक प्रसाद श्रेष्ठलगायत अन्य अतिथिहरूको उपस्थिति रहेको थियो। अन्तरक्रिया कार्यक्रममा राप्ती नगरपालिका भित्र रहेका होटल तथा किराना व्यवसायीहरूको उल्लेखनीय सहभागिता रहेको थियो।
कार्यक्रममा खाद्य स्वच्छता, गुणस्तर मापदण्ड तथा सुरक्षित खाद्य अभ्यास सम्बन्धी विभिन्न विषयमा विस्तृत छलफल गरिएको थियो। सहभागीहरूले आफ्ना अनुभव, जिज्ञासा तथा समस्याहरू प्रस्तुत गर्दै खाद्य सुरक्षामा सुधार ल्याउने उपायहरूबारे विचार आदानप्रदान गरेका थिए।
आयोजक पक्षले यस्ता अन्तरक्रिया कार्यक्रमहरूले व्यवसायीहरूलाई सचेत बनाउँदै उपभोक्तालाई सुरक्षित तथा गुणस्तरीय खाद्य वस्तु उपलब्ध गराउन महत्वपूर्ण योगदान पुग्ने विश्वास व्यक्त गरेको छ।
