काठमाडौं । व्यवसायी तथा अभियन्ता दुर्गा प्रसाईंविरुद्ध काठमाडौं जिल्ला अदालतमा ‘विद्युतीय (इलेक्ट्रोनिक) कारोबार ऐन’ सम्बन्धी कसुरमा मुद्दा दायर गरिएको छ ।
सरकारी वकिलको कार्यालयले प्रसाईंलाई विद्युतीय माध्यमबाट भ्रामक र उत्तेजक अभिव्यक्ति फैलाएको अभियोगमा ५ वर्षसम्मको कैद र एक लाख रुपैयाँसम्म जरिवानाको माग दाबी गर्दै मंगलबार अदालतमा अभियोगपत्र दर्ता गरेको हो ।
के हो आरोप ?
निर्वाचन आयोगको पत्र र प्रहरीको प्रतिवेदनका आधारमा प्रसाईंविरुद्ध मुद्दा चलाइएको हो । अभियोगपत्रका अनुसार, प्रसाईंले सामाजिक सञ्जाल (फेसबुक) मार्फत २०८२ साल फागुन २१ को प्रतिनिधि सभा सदस्य निर्वाचनको सन्दर्भमा भ्रामक श्रव्यदृश्य सामग्री (भिडियो) सार्वजनिक गरेको आरोप छ । उनले निर्वाचन आचारसंहिता विपरीतका सामग्री फैलाएको र निर्वाचन प्रक्रियालाई नै प्रभावित पार्ने गरी अभिव्यक्ति दिएको अभियोगमा उल्लेख छ ।
प्रसाईंले आफ्ना भिडियोहरूमा निर्वाचनलाई ‘विदेशीको इशारामा हुन लागेको’ र ‘नौटंकी’ भन्दै पहिला ‘राजसंस्था र हिन्दु अधिराज्य कायम हुनुपर्ने’ जस्ता उत्तेजक कुराहरू बोलेको प्रमाणका रूपमा पेश गरिएको छ । उनले ‘यो चुनाव गरियो भने देश टुक्रिन्छ’ जस्ता अभिव्यक्ति दिएर जनमानसमा त्रास र भ्रम सिर्जना गरेको सरकारी पक्षको दाबी छ ।
सरकारी वकिलले प्रसाईंविरुद्ध विद्युतीय कारोबार ऐन, २०६३ को दफा ४७ (१) बमोजिम सजायको माग गरेको छ । यस दफाअनुसार कसुर पुष्टि भएमा १ लाख रुपैयाँसम्म जरिवाना वा ५ वर्षसम्म कैद वा दुवै सजाय हुन सक्छ । साथै, प्रसाईंले पटक-पटक यस्ता कसुर गरेको भन्दै थप सजायको माग समेत गरिएको छ ।
त्यति मात्र नभई, अपराध पीडित संरक्षण ऐन, २०७५ को दफा ४१ बमोजिम पीडित राहत कोषमा क्षतिपूर्ति शुल्क भराउन पनि माग गरिएको छ ।
प्रसाईंको बयानमा के छ ?
अभियोगपत्रमा उल्लेख भएअनुसार, दुर्गा प्रसाईंले आफ्नो बयानमा सामाजिक सञ्जालमा उक्त भिडियोहरू आफैँले पोष्ट गरेको स्वीकार गरेका छन् । तर, उनले ती अभिव्यक्तिहरू संविधानले दिएको मौलिक हक र अभिव्यक्तिको स्वतन्त्रता अन्तर्गत रहेर दिएको दाबी गरेका छन् । उनले निर्वाचनको विरोध नगरेको तर राजसंस्था र हिन्दु राष्ट्रको पक्षमा जनचेतना फैलाउन खोजेको बताएका छन् ।
प्रहरीले प्रसाईंको फेसबुक पेजबाट लिइएका ३ वटा फरक-फरक लिङ्क र भिडियोहरू संकलन गरी डिभिडी र स्क्रिनसटहरूलाई दसी प्रमाणका रूपमा अदालतमा बुझाएको छ । यस्तै, हत्तलाल लामा लगायतका मानिसहरूलाई बुझिएको घटना विवरण कागजात पनि संलग्न गरिएको छ ।
