चितवन । चित्र म्युजिक ब्याण्डको पहिलो गीत ‘थरिथरि’ सार्वजनिक गरिएको छ । नारायणगढस्थित एडम्स लाउञ्ज एण्ड बारमा मंगलबार साँझ आयोजित एक विशेष कार्यक्रमबीच गीतको म्युजिक भिडियोसहित सार्वजनिक गरिएको हो । गीतमार्फत नेपालका विभिन्न जातजाति, भाषा र संस्कृतिको प्रवर्द्धन गर्ने उद्देश्य राखिएको बताइएको छ । नेपाल हिमाल, पहाड र तराई गरी विविध भूगोल तथा संस्कृतिले भरिपूर्ण देश भएको र ती छुट्टाछुट्टै पहिचानलाई ‘थरिथरि’ गीतको भिडियोमा जीवन्त रूपमा प्रस्तुत गरिएको छ । गीतमा गायक सलिम एम एस एम को आवाज, प्रसन्न शाह को संगीत तथा गोविन्द थापा (हसलर) को र्याप समावेश रहेको छ । चितवनको संगीत क्षेत्रमा यी तीनै नाम परिचित रहे पनि पहिलोपटक ‘चित्र’ को ‘थरिथरि’ गीतमा उनीहरू एकसाथ सहकार्य गरेको गायक सलिम एम एस एम ले जानकारी दिनुभयो । उहाँका अनुसार ‘थरिथरि’ गीतको म्युजिक भिडियो चित्रको युट्युब च्यानलमार्फत पनि हेर्न सकिने छ । साथै, संगीतलाई माया गर्ने सम्पूर्ण दर्शक–श्रोतालाई गीतलाई मन पराई माया र थप हौसला प्रदान गर्न आग्रह गरिएको छ । गीत सार्वजनिक कार्यक्रममा चित्र म्युजिक ब्याण्डले आफ्ना प्रत्यक्ष प्रस्तुति समेत राख्दै उपस्थित दर्शक–श्रोतालाई मनोरञ्जन प्रदान गरेको थियो ।
"हामी सबैको एउटै आवाज"
