रोट्रयाक्ट पूर्वी चितवनमा नयाँ नेतृत्व : बाढी पीडितलाई ५० हजार सहयोग गर्ने निर्णय
खैरहनी, भदौ १४ ।
रोट्रयाक्ट क्लब अफ पूर्वीको अध्यक्षमा शिशिर सिग्देल चयन भएका छन् । पूर्वी चितवनको खैरहनीमा क्लबको सातौँ पदस्थापना समारोहबाट सिग्देललाई अध्यक्षको जिम्मेवारी दिइएको हो । निवर्तमान अध्यक्ष विजय उप्रेतीले सिग्देललाई नेतृत्व हस्तान्तरण गर्नुभएको हो। विपद्को समयमा फजुल खर्चभन्दा पीडितको आवश्यकतालाई प्राथमिकता दिने उद्देश्यले क्लबले पदस्थापना समारोहको खर्च कटौती गरी देशका विभिन्न भागका बाढी तथा पहिरो प्रभावितका लागि दुई चरणमा रु. ५० हजार राहत उपलब्ध गराउने निर्णय समेत गरेको छ।
रोटरी क्लब अफ पूर्वी चितवनका निवर्तमान अध्यक्ष एवं प्रमुख अतिथि गुणराज अर्याल (महेश) ले नवनिर्वाचित अध्यक्ष सिग्देललाई पद तथा गोपनीयताको शपथ गराउनुभएको थियो। सपथ लगत्तै अध्यक्ष सिग्देलले नयाँ कार्यसमितिका पदाधिकारीलाई शपथ गराएका हुन् । कार्यक्रममा संस्थापक अध्यक्ष पुजन लामिछानेले चार्टर्ड प्रमाणपत्र हस्तान्तरण गर्नुका साथै नयाँ सदस्यहरूलाई स्वागत गरेका थिए ।
उपाध्यक्ष अनिस बरालको स्वागत, सह-सचिव सक्षम सढौलको धन्यवाद ज्ञापन, सर्जेन्ट एट आर्म्स जेनी श्रेष्ठको प्रतिवेदन र स्पर्शा नहर्कीको सञ्चालनमा सम्पन्न कार्यक्रममा रोट्रयाक्ट सहायक जिल्ला नेतृत्व प्रशिक्षक राजीव घिमिरे, भरतपुर हाइट्सका अध्यक्ष अंकित श्रेष्ठ, रोटरीका राममणि कँडेल लगायत पूर्व अध्यक्षहरूले नयाँ नेतृत्वलाई शुभकामना दिँदै राहत सहयोगको निर्णयको उच्च प्रशंसा गरे। नवनिर्वाचित अध्यक्ष सिग्देलले आफ्नो कार्यकालमा सामाजिक सेवा, युवा नेतृत्व विकास र समुदायसँगको सहकार्यलाई अझ प्रभावकारी बनाउने प्रतिबद्धता व्यक्त गरे ।
