काठमाण्डौ — बारामा तीन वर्षीया बालिकाको बलात्कारपछि हत्या भएको घटनालाई लिएर चार दिनदेखि अवरुद्ध वीरगन्ज–पथलैया औद्योगिक करिडोर सडकखण्ड खुलेको छ ।
पीडित परिवार र सरकारबीच हिजो बेलुका नयाँ सहमति भएपछि आन्दोलनरत पक्षले सडक अवरोध हटाएको हो । सडक खुलेसँगै वीरगन्ज–पथलैया सडकखण्डमा गाडी चल्न थालेको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, पथलैया, बाराले जनाएको छ ।
घटनालगत्तै यसअघि भएको सहमति पीडित परिवारले अस्वीकार गरेपछि गएको बुधबार ३ गतेदेखि सडक अवरोध हुँदै आएको थियो । त्यसपछि बालिकाका आमाबुबा हिजो काठमाण्डौ आई गृहमन्त्रीसहित छलफल गरी गएराति ३ बुँदे सहमति भएपछि आन्दोलन स्थगित गरिएको हो ।
आन्दोलनका क्रममा वीरगन्ज–पथलैया सडक अवरुद्ध हुँदा त्यस क्षेत्रको यातायात तथा औद्योगिक गतिविधिसमेत प्रभावित भएको थियो । गएको साउन ३१ मा बेपत्ता भएकी ती बालिकाको भदौ २ गते शव भेटिएको थियो ।
