राप्ती, चितवन । राप्ती नगरपालिकाबाट रासायनिक मल वितरणका क्रममा विभेद, अपारदर्शिता तथा मनोमानी भएको भन्दै श्री जनजागृत हरियाली ताजा तरकारी तथा फलफूल उत्पादक सहकारी संस्था लिमिटेडले आपत्ति जनाएको छ ।
राप्ती नगरपालिका–५, भण्डारामा आयोजित पत्रकार सम्मेलनमार्फत सहकारीले नगरपालिकाको मल वितरण प्रणालीप्रति असन्तुष्टि जनाउँदै सम्बन्धित निकायको ध्यानाकर्षण गराएको हो ।
पत्रकार सम्मेलनमा सहकारीका अध्यक्ष धर्मराज कँडेलले नगरपालिकामा रहेका निजी एग्रोभेट तथा पसलहरूलाई पर्याप्त मात्रामा रासायनिक मल उपलब्ध गराइए पनि किसानसँग प्रत्यक्ष जोडिएको आफ्नो सहकारीलाई भने विभेदपूर्ण व्यवहार गरिएको आरोप लगाउनुभयो ।
अध्यक्ष कँडेलका अनुसार पछिल्लो दुई महिनादेखि अन्य सहकारी संस्थाको तुलनामा आफ्नो संस्थाले आधा मात्रै मल प्राप्त गर्दै आएको छ । यसले सहकारीमा आबद्ध किसानलाई आवश्यकताअनुसार मल वितरण गर्न कठिनाइ भएको उहाँको भनाइ छ ।
उहाँले पछिल्लो पटक युरिया मल ११५ बोरा मात्रै प्राप्त भएको तर डीएपी मल एक बोरा पनि उपलब्ध नभएको जानकारी दिनुभयो । जबकि भण्डारास्थित एक कृषि पसलले २३५ बोरा युरिया र ५० बोरा डीएपी मल प्राप्त गरेको उहाँको दाबी छ । एउटै नगरपालिकाभित्र मल वितरणमा यस्तो असमानता हुनुको कारणबारे उहाँले प्रश्न उठाउनुभयो ।
करिब १ हजार ६०० शेयर सदस्य तथा १ हजार ५०० भन्दा बढी अन्य किसान सहकारीसँग आबद्ध रहेको उल्लेख गर्दै अध्यक्ष कँडेलले सबै किसानलाई आवश्यक मल उपलब्ध गराउन समस्या भइरहेको बताउनुभयो ।
मल वितरणमा देखिएको समस्या समाधानका लागि आफूहरूले नगरपालिकाका उपप्रमुखदेखि प्रमुखसम्म पटक–पटक गुनासो गरेको उहाँले बताउनुभयो । त्यसैगरी प्रमुख जिल्ला अधिकारी, प्रतिनिधिसभा सदस्य हरि ढकाल तथा कृषि विकास कार्यालयका प्रमुख झलकनाथ खरेलसमक्ष समेत समस्या राख्दा पनि सुनुवाइ नभएको उहाँको गुनासो छ ।
किसानको समस्याबारे पटक–पटक सम्बन्धित निकायलाई जानकारी गराउँदा पनि सुनुवाइ नभएपछि किसानहरू कहाँ जाने भन्ने प्रश्नसमेत अध्यक्ष कँडेलले उठाउनुभयो ।
सहकारीले रासायनिक मल वितरण प्रणालीलाई पारदर्शी, व्यवस्थित र निष्पक्ष बनाउन माग गर्दै किसानलाई समान तथा आवश्यकताअनुसार मल उपलब्ध गराउन सम्बन्धित निकायसँग आग्रह गरेको छ ।
