काठमाण्डाै – मकवानपुरको भीमफेदीमा हिजो बिहान भएको माइक्रोबस दुर्घटनामा ज्यान गुमाएकाहरूको शव उठाउन परिवार र आफन्तले मानेका छैनन् । उनीहरूले सङ्घीय सरकारबाट क्षतिपूर्ति उपलब्ध गराउन माग गरेका छन् ।
काठमाण्डौबाट सर्लाहीका लागि छुटेको मधेश प्रदेश ०३–००१ ज ०८८० नम्बरको माइक्रोबस मकवानपुरको भीमफेदी गाउँपालिका–६ चिसापानीगढीमा सडकबाट खसेर दुर्घटना हुँदा १४ जनाको ज्यान गएको थियो । तीमध्ये एक जनाको शव परिवारले बुझिसकेका छन् ।
बाँकी १३ जनाको शव हेटौँडा अस्पतालको शव गृहमा रहेको जिल्ला प्रहरी कार्यालय मकवानपुरका प्रहरी प्रवक्ता डीएसपी माधवप्रसाद काफ्लेले जानकारी दिनुभयो ।
शव उठाउन नमानेका आफन्तले ज्यान गुमाएकाको परिवारलाई जनही १० लाख रुपैयाँ क्षतिपूर्ति, परिवारका सदस्यलाई रोजगारीको व्यवस्था तथा घाइतेको उपचार खर्च सरकारले व्यहोर्नुपर्नेलगायतका माग राखेका छन् ।
मृतक र घाइतेका परिवार तथा आफन्तसहित प्रशासनको टोली सहमतिका लागि निरन्तर छलफलमा रहेको छ ।
मकवानपुरका प्रमुख जिल्ला अधिकारी वसन्त अधिकारीले सरकारले उपलब्ध गराउने कानून तथा नियमअनुसारको क्षतिपूर्ति दिन कुनै बाधा वा अवरोध नरहेको बताउनुभएको छ । तर परिवार र आफन्तले सङ्घीय सरकारबाट थप सम्बोधन हुनुपर्ने माग राखेपछि शव हस्तान्तरणको प्रक्रिया अघि बढ्न नसकेको उहाँको भनाइ छ ।
